حسێن حەسەن قادر ناسراو، بە شێخ باقر شێخ حسێن، ساڵی ١٩١٧ لە گوندی سۆڵەی سەربە ناحیەی قەرەداغى پارێزگاى سلێمانى لە دایک بووە، گوندنشین بووە و سەرقاڵی کاری ئاینی و تەکیەداری دەڤەرەکە بووە، قۆناغی سەرەتایی لەلای مەلا عەبدولکەریم لە بیارە تەواو کردووە، بۆ درێژەدان بە خوێندنی ئاینی چۆتە دەربەندیخان و خوێندنی مامۆستای ئایینی تەواو کردووە و مۆڵەتی مامۆستای ئایینی وەرگرتووە، خێزاندار بووە و خاوەنی دوو کوڕ و چوار کچ بووە.
شێخ باقر شێخ حسێن، ساڵی ١٩٦٣ پلەی ئەندامێتی پارتی دیموکراتی کوردستان و پلەی مامۆستای ئاینی شۆڕشی لەلایەن جەنابی بارزانی نەمرەوە پێ بەخشراوە، بۆتە بەرپرسی ڕێکخستنی مامۆستایانی ئاینی پارتی دیموکراتی کوردستان لە دەڤەری قەرەداغ و شارەزوور و شاری سلێمانی. ڕۆڵێکی باڵای بینیوە لە پاڵپشتیکردنی هێزی پێشمەرگە و ئاراستەکردنی مامۆستایانی ئاینی دەڤەرەکە بۆ هاوکاریکردنی هێزی پێشمەرگە، هەروەها گەیاندنی پەیام و ڕێنمایەکانی سەرکردایەتی شۆڕش بۆ هێزی پێشمەرگە.
لە ٩ی حوزەیرانی ١٩٧٤ لەگەڵ شەهید حەمە شەمیرانی بەرپرسی هێزی شەمیرانی سەربە هێزی خەباتی پارتی دیموکراتی کوردستان لە مزگەوتی گوندی سۆڵە کۆبوونەوەی ڕێکخراوەییان ئەنجام داوە و هەواڵ گەیشتۆتە سوپاى عێراق، لەلایەن تۆپخانەکانی سوپاى عێراق بە چڕی تۆپبارانی گوندی سوڵەیان کردووە، لە ئەنجامدا شێخ باقر شێخ حسێن شەهید بووە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
