ژیاننامە
سەربەست سەبری کاکۆ حوسێن لە ساڵی ١٩٦٣ لە شارۆچکەی شەقلاوە لەدایکبووە. قۆناغی شەشی ئامادەیی لە بەشی زانستی تەواو کردووە. دایکى ناوى عاسیە ئەحمەد مستەفا بووە، سەربەست سەبرى دوو برا بە ناوەکانی سەرباز سەبری, هەورۆ سەبری و دوو خوشکیش بە ناوەکانی گەلاوێژ سەبری, نەمام سەبری هەبوون.
خەباتنامە
لە ساڵی ١٩٨٢ لە ڕێى ئازاد ماوەرانییەوە پەیوەندی بە ڕێکخستنەکانى پارتی دیموکراتی کوردستانەوە دەکات، دواتر لە ساڵى ١٩٨٣ ئاشکرا دەبێت و لەلایەن ئەمنى شەقڵاوە دەستبەسەر دەکرێت و پاشان رەوانەی گرتووخانەی ئەبوغرێب دەکرێت و سێ ساڵ زیندانی دەکرێت کە بەهۆیەوە هەموو نینۆکەکانی و چەند پەنجەیەکى لەدەست دەدات، تا لە کۆتایی ساڵی ١٩٨٦ بەر لێخۆش بوون دەکەوێت و ئازاد دەبێت.
لە ساڵی ١٩٨٧ پەیوەندی کردووەتەوە بە مەفرەزاکانی لقی دوو کە ئەوکات مەلا محمد بەرپرسی لق بوو. لە ساڵی ١٩٨٨ لە دۆڵی بالیسان دوای تەواوکردنی ئەرکێک و گەڕانەوەی بۆ بارەگای لق، دەکەوێتە بۆسەی دوژمنانەوە و دەست بەسەر دەکرێت، دوای یەک مانگ لە زیندانیکردن و ئەشکەنجەدانی، شەوێک کە خەریکى گواستنەوەى دەبن لە پشت گوندى ئەسپیندارەى خۆشناوەتى گولە بارانى دەکەن و شەهید دەبێت.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
