سلێمان حادێ دیوالى، ناسراو بە سلێمان حادێ دۆلەمەرى، ساڵى ١٩١٧ لە گوندى بۆکرانى ناحیەى مەزنێی قەزاى مێرگەسۆرى پارێزگاى هەولێر لەدایک بووە، لەبەر نەبوونى قوتابخانە لەگوندەکەیان نەچۆتە بەر خوێندن، خێزاندار بووە، ساڵى ١٩٧٥ دواى نسکۆى شۆڕشى ئەیلوول ئاوارەى وڵاتى ئێران بووە و لە شارى کەرەج نیشتەجێ بووە، ساڵى ١٩٩١ دواى ڕاپەڕینى جەماوەرى کوردستان خانەوادەکەى گەڕاونەتەوە باشوورى کوردستان. لە ڕۆژى ١٧ى ئایار ٢٠١٢ لە یەکێک لە نەخۆشخانەکانەى شارى ئەنکەرەى پایتەختى وڵاتى تورکیا کۆچى دوایی کردووە و تەرمەکەى گەڕێندراوەتەوە باشوورى کوردستان و لەزێدى خۆى بەخاک سپێردراوە.
ساڵى ١٩٤٣ پەیوەندى بە ڕیزەکانى پێشمەرگەى شۆڕشى دووەمى بارزان کردووە، بەشدارى چەککردنى بنکەى پۆلیسى شانەدەر، دۆڵى ڤاژێ، مەزنێ و شێروان مەزندا کردووە، ساڵى ١٩٤٥ بەشدارى شەڕى مەیدان مۆریکى کردووە، لە ١١ى تشرینى یەکەمى ساڵى ١٩٤٥ لەگەڵ بارزانى چووەتە ڕۆژهەلاتى کوردستان و بەشدارى لە پاراستنى کۆمارى دیموکراتی کوردستان لە مهاباد کردووە، بەشدارى شەڕەکانى بەرى سەرا و شەڕى قاراو کردووە.
دواى ڕوخانى کۆمارى کوردستان بە هۆى نەخۆشى باوکى لەگەڵ بارزانى نەمر نەچۆتە سۆڤیەت و گەڕاوەتەوە باشوورى کوردستان، ماوەیە لەدەشتە دیانا لە زەوییەکى تێلدڕک کراو بەند کراوە و دواتر گەڕاوەتەوە گوندەکەیان.
ساڵى ١٩٦١ لەسەرەتاى هەڵگیرسانى شۆڕشى ئەیلوول دژى حکومەتى عێراق، سلێمان حادى پەیوەندى بە ڕێزەکانى هێزى پێشمەرگەى شۆڕشى ئەیلوول کردووە، بەشدارى شەرەکانى مرێبا، گەلى زاویتە و سەرسنگى کردووە. دواى پاککردنەوەى دەڤەرى بادینان لە هیزەکانى سوپاى عێراق، سلێمان حادێ لەگەڵ بارزانى نەمر پەڕیەوەتەوە بۆ دەڤەرى سۆران و بەشدارى شەڕى ماخوبزنانى لە دەڤەرى قەڵادزێ کردووە. ساڵى ١٩٦٣ کاتێک سوپاى عێراق پەلامارى سەرى ئاکرێ و پێرسی دا، دووبارە لەگەڵ بارزانى گەڕاوەتەوە بۆ بارزان و بەشدارى شەڕى سەری پێرسى کردووە.
سلێمان حادێ دێوالى دۆلەمەرى ساڵى ١٩٦٣ تا ١٩٧٥ پاسەوانى بارەگاى بارزانى نەمر بووە، لە ٣١ى ١٩٧٩ ئازارى لەگەڵ ئیدریس بارزانى بووە، ساڵى ١٩٨٣ چاوى چەپى لەدەست داوە. لە ٣١ى کانوونى دووەمى ١٩٨٧ لەگەڵ نێچیرڤان بارزانى بووە، ساڵى ١٩٩١ لەگەڵ نێچیرڤان بارزانی گەڕاوەتەوە باشوورى کوردستان و بەشدارى ڕاپەڕینى جەماوەرى کوردستانى دژى حکومەتى عێراق کردووە. ساڵى ١٩٩٣ کراوەتە بەرپرسی لێژنەى کۆمەڵایەتى دۆلەمەرییەکان.
لە ١٦ى ئابى ١٩٩٦ لە یۆبیلى زێڕینى پارتى دیموکراتى کوردستان، بە هۆى ئەو خزمەتانەى کە کردوونى لەلایەن سەرۆک مەسعود بارزانی میدالیاى بارزانى پێ بەخشراوە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
