ژیاننامە
خالید حەمزە قاسم محەمەد لە ساڵی ١٩٥٥ لە گەڕەکی تەیراوەی پارێزگای هەولێر لە دایکبووە، شارنشین بووە و سەرقاڵی کەسابەتی ناو بازاڕی هەولێر بووە، ئاستی خوێندەواری سەرەتایی بووە، دوای نسکۆی شۆڕشی ئەیلوول ئاوارەی وڵاتی ئێران بووە، لە ساڵی ١٩٧٦ گەڕاوەتەوە خاکی کوردستان و لەلایەن ڕژێمی ئەوکاتی عێراق دوورخراوەتەوە بۆ باشووری عێراق. خالید حەمزە خێزاندار بووە و خێزانی ناوی سەبیحە شێخ محەمەد بووە و خاوەنی چوار کچ بووە بەناوەکانی هەتاو، چیمەن، ئەیمەن و دیمەن.
خەباتنامە
شەهید خالید حەمزە لە ساڵی ١٩٧٢ بۆتە پێشمەرگە لە بەتالیۆنی کەندەگوڵی سەربە هێزی حەمرینی پارتی دیموکراتی کوردستان، کە لەوکاتەدا عەلی میرۆ زراری فەرماندەی بەتالیۆن بووە، لەگەڵ هەڵگیرسانەوەی شۆڕشی ئەیلوول لە ساڵی ١٩٧٤ پلەی سەرپەلی وەرگرتووە و بەشداری کارای هەبووە لەسەرجەم داستانەکانی هێزی حەمرین.
لە دوای ئاوارەیی و دوورخستنەوەی شەهید خالید حەمزە لە ساڵی ١٩٨٠ پەیوەندی کردۆتەوە بە خاڵە سەید کاکە، لە ساڵی ١٩٨١ بۆتە بەرپرسی شانەی نهێنی ناو شاری هەولێر، لە ساڵی ١٩٨٣ هێزێکی زۆری ئەمنی هەولێر چواردەوری ماڵی گرتووە و شەهید خالید حەمزە ڕووبەڕووی هێزەکە بۆتەوە، دوای چەند کاتژمێرێک لە ڕووبەڕووبوونەوە بە سەختی بریندار بووە و بە برینداری خۆی لەدەست هێزەکەی بەعس دەرباز کردووە، کە برینەکەی لە ناوسک و ڕێخۆڵەی بووە، بۆ چارەسەر وەرگرتن ڕووی کردۆتە قەزای شەقڵاوە و ماوەی شەش مانگ ماوەتەوە بۆ چارەسەر وەرگرتن.
لە ساڵی ١٩٨٤ پلەی فەرماندەی مەفرەزەی سەربە هێزەکەی خاڵە سەید کاکە وەرگرتووە، کە چەند جارێک بۆ چالاکی سیاسی و چەکداری گەڕاوەتەوە بۆناو شاری هەولێر، لە ڕێکەوتی ٤ی شوباتی ١٩٨٥ شەهید خالید حەمزە لەگەڵ دوو هاوسەنگەری بۆ چالاکیەک چوونەتە ناو شاری هەولێر و ئاشکرا کراون، سەر لە ئێوارەی هەمان ڕۆژ شەهید خالید حەمزە لە شەقامی سورچیان کەوتۆتە ناو بۆسەی سەربازانی ڕژێمی بەعس و دەستگیر کراوە، دوای هەشت مانگ لە زیندانیکردنی لە ڕێکەوتی ١٠ی تشرینی یەکەمی ١٩٨٥ لە گرتووخانەی ئەبوغرێب لەگەڵ هاوسەنگەرێکی بەناوی عیسا دووسەرە لە سێدارە دراون و شەهید بوونە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
