ژیاننامە
حەمەغەریب عارف محەمەد مەحمود لە ساڵی ١٩٢٢ لە گوندی پریسی سەرووی سەربە پارێزگای هەڵەبجە لە دایکبووە، گوندنشین بووە و سەرقاڵی کاری جوتیاری بووە، خێزانی ناوی نەفیە عەبدولقادر و کوڕەکانی ناویان یاسین، نەجمەدین، یادگار و جەلالە و کچەکانی ناویان حەمیدە، سەباح و غەمگینە.
خەباتنامە
حەمەغەریب عارف محەمەد مەحمود لە ساڵی ١٩٦١ بووە پێشمەرگە لە هێزی شەمێران بە فەرماندەیی حەمە شەمێرانی، کە لەوکاتەدا قوەتی شەمێران قوەتێکی سەربەخۆ بووە و فەرمانی لە سەرکردایەتی شۆڕشەوە وەرگرتووە، هەروەها سنووری چاڵاکی ئەم قوەتە لە دەڤەڕی شەمێران و دەڤەری نەوڕۆڵی بووە زیاتر. بەڵام دوای دروست کردنی پێکهاتەی سەربازی شۆڕشی ئەیلوول لە ساڵی ١٩٦٥ ئەم قوەتە هەر وەک قوەتێکی سەربەخۆ مایەوە و خرایە سەر هێزی خەباتی پارتی دیموکراتی کوردستان.
لە ساڵی ١٩٦٣ پلەی فەرماندەی بەتالیۆنی لە هێزی شەمێران وەرگرتووە، بەشداری شەڕەکانی دەڤەری نەوڕۆڵی و دەشتی شارەزوور و دەڤەری شەمێران و قەزای دەربەندیخانی کردووە، لە ساڵی ١٩٦٨ لە دەڤەری نەوڕۆڵی کەوتووە بۆسەی سەربازانی ڕژێم و دوای ڕووبەڕووبوونەوە بە برینداری دەستبەسەر کراوە و لە ناو بازاڕی شاری هەڵەبجە بە برینداری گوللەباران کراوە و شەهید بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
