ژیاننامە
حەسەن عەبدولڕەحمان، ساڵى ١٩٤٥ لە گوندى زێوەى سەر بەقەزاى ڕواندز لەدایک بووە، خێزاندار بووە، ساڵى ١٩٧٥ دواى نسکۆى شۆڕشی ئەیلوول ئاوارەى وڵاتى ئێران بووە، لە شارى نەلیوان ئاکنجى بووە، پاشان گوازراوەتەوە بۆ شارى ئەسفەهان، ساڵى ١٩٧٩ دواى شۆڕشی گەلانی ئێران گەڕاوەتەوە بۆ ڕۆژهەڵاتى کوردستان و لە شارۆچکەى زێوە نیشتەجێ بووە، ساڵى ١٩٩١ گەڕاوەتەوە بۆ باشوورى کوردستان و لە شاردەدێی پیرمام نیشتەجێ بووە، لە ٦ی ئایارى ١٩٩٧ کۆچى دوایی کردووە، لە ٧ی ئایارى ١٩٩٧ لە گۆڕستانى گوندى بەرزێوەى سەر بەقەزاى ڕواندز بەخاک سپێردراوە. زمانى کوردی و فارسی زانیوە.
خەباتنامە
ساڵى ١٩٦٥ پەیوەندى بە هێزى پێشمەرگەى شۆڕشی ئەیلوول کردووە، بۆتە سەرپەل لە بەتالیۆنى١ى زۆزکى سەربەهێزى باڵەک، پاشان پلەى جێگرى بەتالیۆنى ١ی زۆزکى وەرگرتووە، لە نێوان ساڵانى (١٩٦٥-١٩٦٦) بەشدارى شەڕەکانى چیای زۆزک، گردوگۆ، گوندى گوان و گەروى عومەرئاغاى کردووە. ساڵى (١٩٧٤-١٩٧٥) بەشدارى شەڕەکانى چیاى زۆزک، چیاى کۆڕەک، سەرتیز، گەرووى بێشە، گوندى هەسنان، شەڕى چیای حەسەن بەگ کردووە.
ساڵى ١٩٧٩ دەکرێتە ئامر هێزى سەرکردایەتى، ساڵى ١٩٨٠ بەشدارى شەڕى حاجى ئۆمەرانى کردووە، هەروەها بەشدارى گرتنى بارەگاى فەوجى سوپاى عێراقى لەبەردى تەشی ڕێسێ کردووە، ساڵى ١٩٨١ وەکو فەرماندەى هێزى سەرکردایەتى گەڕاوەتەوە باشوورى کوردستان بۆ ئەنجامدانى چالاکى لە دەڤەرەکانى شارەزوور و هەورامان و شارباژێڕ، بەشدارى کردووە لەوانە شەڕى بانەنۆک و هەرمێ و ناڵپارێز و پرخى پاشکەند و ناوکێل و لێدانى منەزەمەى سەیدسادق. ساڵى ١٩٧٩ ئەندامى کۆنگرەی نۆیەمی پارتی دیموكراتی كوردستان بووە،
ساڵى ١٩٨١ دواى تەواو بوونى ئەرکەکەى لە دەڤەرەکە، گوازراوەتەوە بۆ سنوورى لقى ٢ و کراوەتە بەرپرسى هێزى زۆزک لەدەڤەرى باڵەکایەتى، ساڵى ١٩٨٢ پلەى کارگێڕى ناوچەى پیرمام و لۆلانى وەرگرتووە، ساڵى ١٩٨٦ پلەى بەرپرسی لێژنە ناوچەى ڕواندزى وەرگرتووە، بەشدارى چەندین شەڕ و چالاکى لە دۆڵى بالیسان و هیران و نازەنین کردووە، ساڵى ١٩٨٧ ڕۆڵێکى کاراى هەبووە لە ڕاپەڕینى خەڵکى ڕواندز دژى دامودەزگاکانى ڕژێمى بەعس لە شارەکە. لەشەوى ١٧ لەسەر ١٨ی شوباتى ١٩٨٨ لە کاتى هێرشکردنە سەر ڕەبایەى سوپاى عێراق لە ئەشکەوتى شەهیدان لە چیاى هندرێن دەکەوێتە سەر مینى سوپا و قاچێکى لەدەست دەدات.
ساڵى ١٩٩١ هاوڕێ لەگەڵ سەرۆک مەسعود بارزانی دەگەڕێتەوە بۆ باشوورى کوردستان بۆ بەشداریکردن لەڕاپەڕینى خەڵکى کوردستان دژى حکومەتى بەعس، بەشدارى ڕاپەڕینى شارى ڕانیە و شارى ئاکرێ دەکات.
ساڵى ١٩٩٣ لە لقى ١٠ی پارتى دیموکراتى کوردستان پلەى ئەندامى لق بەشى عەسکەرى وەردەگرێت، دواى دامەزراندنى سوپاى ٦ى هێزى پێشمەرگە پلەى جێگرى فەرماندەى سوپاى وەرگرتووە، پاشان بوو بە ئەندامى فەرماندەى سنوور، ساڵى ١٩٩٧ پلەى ئەندامى مەکتەبى کۆمەڵایەتى گشتى پارتى دیموکراتى کوردستانى وەرگرتووە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
