حیکمەت عەلى عەبدولکەریم، ناسراو بە حیکمەتى مەلاعەلى، ساڵى ١٩٣٦ لە شارى هەڵەبجە لە دایک بووە، تا پۆلى پێنجەمى بنەڕەتى خوێندووە، خێزاندار بووە، ساڵى ١٩٧٥ دواى نسکۆى شۆڕشی ئەیلوول چووەتە ئێران بەڵام لەمانگى تشرینى دووەمى ساڵى ١٩٧٥ گەڕاوەتەوە شارى هەڵەبجە. ساڵى ١٩٨٠ ئاوارەى وڵاتى ئێران بووە، ساڵى ١٩٩١ گەڕاوەتەوە باشوورى کوردستان. لە ٢٤ى کانوونى دووەمى ٢٠٠٤ کۆچى دوایی کردووە.
ساڵى ١٩٥٤ پەیوەندى بە ڕێکخستنەکانى پارتى دیموکراتى کوردستان کردووە، ساڵى ١٩٦٠ خۆی و چەند هەڤاڵێکى لەلایەن حکومەتى عێراق دەسگیرکراون و ماوەى پێنج مانگ زیندانى کراون، دواى ئازادبوونى دووبارە بە تۆمەتى کوشتنى جێگرى بەڕێوەبەرى دەزگاى هەواڵگرى عێراق، لەلایەن حکومەت فەرمانى گرتنى دراوە، خۆى بەدەستەوە نەداوە و ڕووى کردووەتە چیاى شنروێ خەریکى ڕێکخستنى پارتایەتى بووە.
ساڵى ١٩٦١ لەگەڵ چەند پێشمەرگەیەکى تر مەفرەزەیەکیان پێک هێناوە و شارۆچکەى تەوێڵە و سۆسەکان و بیارەیان ئازاد کردووە. ساڵى ١٩٦٢ پلەى کادرى لە ڕێکخراوى خورماڵ وەرگرتووە. دواتر بۆتە ئەندامى لێژنە ناوچەى هەڵەبجە و بەرپرسى لێژنە ڕێکخراوى عەبابەیلى تا ساڵى ١٩٧٥ بەردەوام بووە. بەشدارى شەڕەکانى بیرکێ و سوارە، قەمەرە ڕێ، زمناکۆ، هانە زەرد، ملەى سەرتەک، بانى بەمۆ، بانى خۆشک، کانى حەمەکەریم، باخ هەنارە، حاجى لەرە، مەحمود قەجەر، گۆڕشەل، زەڵم، بیارە، دۆڵە سوور، تاڵپارێز، قایە و شەڕەکانى بەدرە و جەسانى کردووە.
ساڵى ١٩٧٧ پەیوەندى بە ڕێکخستنە نهێنییەکانى پارتى دیموکراتى کوردستان کردووەتەوە، ساڵى ١٩٧٩ بەهۆى ئاشکرابوونى لەلایەن حکومەتى عێراق دەسگیرکراوە، بەڵام بەهۆى ئەوەى هیچ بەڵگەیەکیان لەسەرى نەبووە هەر زوو ئازاد کراوە، ساڵى ١٩٨٠ دووبارە ماوەى مانگێک لەلایەن دامودەزگا ئەمنییەکانى عێراق دەسگیرکراوە و دووبارە ئازاد کراوە.
ساڵى ١٩٨٠ دواى ئازادبوونى پەیوەندى بەهێزى پێشمەرگەى شۆڕشی گوڵان کردووە و ڕووى لە ناوچە ئازادکراوەکان کردووە و لەلای نادر عەلى هەورامى بووەتە پێشمەرگە، هەمان ساڵ کراوەتە بەرپرسی سەربازى لێژنە ناوچەى هەڵەبجە تا ساڵى ١٩٨٩ لەو ئەرکەى بەردەوام بووە. بەشدارى چەندین شەڕى لە ناوچەى هەورامان و شارەزوور کردووە لەوانە شەڕەکانى زەڵم، ئەحمەد ئاوا، هانەى قول، ملەقۆنەرە و خۆرنەوازان. ساڵى ١٩٨٩ لەگەڵ لقى ٤ى پارتی دیموکراتى کوردستان بەشدارى ئازادکردنى شارى هەڵەبجەى کردووە.
ساڵى ١٩٩١ بەشدارى ڕاپەڕینى جەماوەرى باشوورى کوردستانى کردووە و ئەندامى میحوەرى هەڵەبجە-شارەزوور بووە. ساڵى ١٩٩٣ کراوەتە بەرپرسی بەشى شەهیدانى پارێزگاى سلێمانى، ساڵى (١٩٩٤-١٩٩٥) بەرپرسی مەکتەبى کۆمەڵایەتى سەرکردایەتى بەرەى کەرکووک-سلێمانى بووە. ساڵى ١٩٩٥ دواى دامەزراندنى لقى ١٢ى هەڵەبجەى پارتى دیموکراتى کوردستان، کراوەتە بەرپرسی بەشى شەهیدانى لق. ساڵى ٢٠٠٠ ئەندامى لێژنە دامەزرێنەرى دەزگاى باڵاى ئەیلوول بووە.
لە ١٦ى ئابى ١٩٩٦ لە یۆبیلى زێڕینى پارتى دیموکراتى کوردستان، بە هۆى ئەو خزمەتانەى کە پێشکێشى کردوون، لەلایەن سەرۆک مەسعود بارزانی میدالیاى بارزانى پێ بەخشراوە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
