ژیاننامه
شه‌هید تەیب ئاكره‌یی له ساڵی ١٩٥٣ له شاری ئاكرێ له‌دایك بووه، ساڵی ١٩٥٩ ده‌ستی به خوێندن كردووه و خوێندنی سه‌ره‌تایی له شاری ئاكرێ و ناوه‌ندی و ئاماده‌یی له شاری زاخۆ ته‌واو كردووه، ساڵی ١٩٧٥ دوای نسكۆی شۆڕشی ئەیلوول ئاواره‌یی وڵاتی ئێران ده‌بێت، خاوه‌ن چوار كچ بووه.
خه‌باتنامه
له سه‌ره‌تای ساڵی ١٩٧٠ په‌یوه‌ندی به ڕێكخستنه‌كانی یه‌كێتی قوتابیانی كوردستانه‌وه ده‌كات، به‌هۆی لێهاتوویی و چالاكییه‌كانی له نێوان ساڵانی (١٩٧٢-١٩٧٤) ده‌بێته به‌رپرسی یه‌كێتی قوتابیانی كوردستان له شاری زاخۆ، ساڵی ١٩٧٤ كه شه‌ڕ ده‌ستیپێكردۆته‌وه ده‌چێته ناو ڕیزه‌كانی شۆڕشی ئەیلوول، ساڵی ١٩٧٥ دوای نسكۆی شۆڕشی ئەیلوول ئاواره‌ی وڵاتی ئێران ده‌بێت و له هه‌مان ساڵدا له ڕۆژهه‌ڵاتی كوردستان له‌لایه‌ن رژێمی شای ئێران ڕاده‌ستی رژێمی به‌عسی عێراق ده‌كرێته‌وه، به‌ڵام خۆی له ده‌ستی رژێمی به‌عس ڕزگار ده‌كات و ده‌گه‌ڕێته‌وه وڵاتی ئێران و له شاری ره‌فسه‌نجان نیشته‌جێ ده‌بێت. ساڵی ١٩٧٩ ده‌بێته به‌رپرسی ڕێكخراوی پارتی له شاری ڕە‌فسه‌نجان، دوای سه‌ركه‌وتنی شۆڕشی ئێران ده‌گه‌ڕێته‌وه ڕۆژهه‌ڵاتی كوردستان و له ئۆردوگای زێوه نیشته‌جێ ده‌بێت، هه‌ر له ساڵی ١٩٧٩ ده‌بێته ئه‌ندامی کۆنگرەی نۆیه‌می پارتی دیموكراتی كوردستان (١٩٧٩) وده‌بێته به‌رپرسی لێژنه ناوچه‌ی ئازادی، له ١٦ی کانوونی دووەمی ١٩٨١ بۆ دووه‌م جار به به‌رپرسی لێژنه ناوچه‌ی ئازادی هه‌ڵده‌بژێردرێت، به‌شداری چالاكییه‌كانی شۆڕشگێڕی له هه‌موو جموجوڵه‌كانی مه‌فره‌زه‌ی پێشمه‌رگه له ناوچه‌كه‌دا ده‌كات و ڕۆڵێكی كاریگه‌ری هه‌بووه، بێجگه له كار و ئه‌ركی حزبایه‌تی به‌ڕێوه‌به‌ری ئۆردوگای زێوه بووه، له ٢٧ی تەممووزی ١٩٨٣ له كاتی چوونی بۆ باره‌گای مه‌كته‌بی سیاسی له نزیك گوندی ڕاژان شه‌هید ده‌بێت و له هه‌ر له ئۆردوگای زێوه به خاك ده‌سپێردرێت.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
