شەهید جەبار ڕەحیم نادر ئەحمەد ناسراو بە… جەبار ڕەحیم تاگۆزی، لە ساڵی 1952 لە گوندی مۆرتێکە سەر بە ناوچەی تاگۆزی سەر بە پارێزگای هەڵەبجە لەدایکبووە. دوای شکستی شۆڕشی ئەیلول، دەبێتە پەنابەر لە ئێران و لە گوندی شێخ سێلا سەر بە شاری جوانڕۆ ژیاوە. خێزاندار بووە و هاوسەرەکەی ناوی (توبە فەتاح) بووە و خاوەنی یەک کوڕ و دوو کچە بە ناوەکانی (جەمیل و شام و ئامینە).
ساڵی 1965 بووەتە پێشمەرگە لە لقی چواری فەوجی شەشەمی بەمۆی هێزی خەباتی پارتی دیموکراتی کوردستان. لەو کاتەدا شەهید قادر حەمەساڵح تاگۆزی مەیجری چوارەم و فازیل تاڵەبانی فەرماندەی فەوجی بوو. لە شۆڕشی ئەیلولدا بەشداری چەندین شەڕی کردووە (شەڕی بارزان، شەڕی زۆزیک، شەڕی پێنجوێن، شەڕی خانەقین).
لە ساڵی ١٩٦٩ لە شەڕی خانەقین تەقەی لێکرا و بە سەختی بریندار بوو. لە هەمان ساڵدا پلەی یەکەمی سیرجێنتی پێبەخشرا. دوای شکست و پەنابەر بوون، دەستبەرداری چەک نەبووە و درێژە بە خەباتی پێشمەرگەی خۆی داوە.
لە ٢٤ی نیسانی ١٩٧٧ لە گوندی بەنی بۆلانی سەر بە ناوچەی تاگۆزی ڕووبەڕووی هێزێکی سەربازی ڕژێمی عێراق بوونەتەوە لەو کاتەدا و لە ئەنجامدا جەبار ڕەحیم و سێ هاوەڵەکەی بە ناوەکانی (حەمە حسێن و جەمیل کەریم و حەمە عەزیز مەحمود) شەهید دەبن.
