ئەحمەد عەلی ئەحمەد مستەفا ناسراو بە ئەحمەدی شێخ عەلی، لە ساڵی 1951 لە ناحیەی بیارە سەر بە پارێزگای هەڵەبجە لەدایک بووە، نیشتەجێی بیارە بووە و بە پلەی یەکەم سەرقاڵی چالاکیی کشتوکاڵی و باخداری بووە. هاوسەرگیری لەگەڵ سوهام مەجید کردووە و سێ کوڕی بە ناوەکانی سیروان، هێمن و عومەر بووە، هەروەها دوو کچی بە ناوەکانی ئامینە و مریەم بووە. بەداخەوە مریەمی کچەکەی دەبێتە قوربانی کیمیابارانی هەڵەبجە لە ١٦ی ئازاری ١٩٨٨. 

ساڵی 1981 پەیوەندی بە هێزی پێشمەرگەی پارتی دیموکراتی کوردستانەوە کرد لە هەورامان. بەهۆی بوونی کاریگەری لە بازنەی کۆمەڵایەتی هەورامان و هەڵەبجە، گوازرایەوە بۆ بارەگای لقی چوار بە سەرۆکایەتی نادر هەورامی کە هەم بەرپرسی لق و هەم فەرماندەی هێزەکانی هەورامان بوو. بەدرێژایی ژیانی پێشمەرگایەتی، ئەحمەد عەلی ئەحمەد سێ برینداری سەختی لێکەوتەوە. ساڵی 1983 لە گوندی تەپاکورا لە دەشتی شارەزوور بە سەختی بریندار دەبێت. لە ساڵی 1984 لە گوندی شیرمەری، کە هاوکات دەکەوێتە دەشتی شارەزوور، برینداری سەختی لێکەوتەوە. دواجار لە ساڵی ١٩٨٦ لە گوندی بەشارەتی کە دەکەوێتە دەشتی شارەزوور بە سەختی بریندار دەبێت.

 وەک ڕێزلێنانێک بۆ خۆبەخشی و ئازایەتییەکەی، لە ساڵی ١٩٨٥ پلەی فەرماندەی فەوجی بۆ هێزەکانی هەورامانی پارتی دیموکراتی کوردستان بەرزکرایەوە، بەداخەوە لە مانگی نیسانی ١٩٨٧ لە کاتی ڕووبەڕووبوونەوەیەکدا لەگەڵ سوپای ڕژێمی بەعس لە چیای زەرد لە ناوچەی قەرەداغ تەقەی لێکرا و شەهید بوو.

سەرچاوە:

• ئەرشیفی ئینسایکلۆپیدیای Kdp