ئەم پەرتوکە لێکۆڵینەوەیەکە لە ساڵی ١٩٧٠ لە بارەی شۆڕشی ئەیلوول ساڵی (١٩٦١-١٩٦٩) بە زمانی فەڕەنسی نووسراوە، وەرگێڕاوەتە سەر زمانی کوردی و لە دوو پێشەکی و نۆ بەش و پاشکۆکان پێکهاتووە.
بەشی یەکەم باسی داتا و زانیارییه مێژوویی و جوگرافیەکانی پەیوەست به پرسی نەتەوەیی کوردستانی عێراق دەکات وەک خاک و دانیشتووان، تێڕوانین و سەرنج بۆ ڕاستییه مێژووییەكان، پرسی ویلایەتی مووسڵ یان چارەنووسی باشووری کوردستان و بارودۆخەکه دوای ساڵی ۱۹۲٥.
بەشی دووەمی ئەم پەرتووکە لە بارەی عەبدولکەریم قاسم و کورد یان هۆکاره ڕاستەوخۆکانی ڕێککەوتن و جەنگە.
بەشی سێیەم باسی شۆڕشی ئەیلوول و پێکهێنەرەکانی دەکات.
بەشی چوارەم باس لە ڕووخانی ڕژێمی قاسم و هەڵوێستی سوپا، هەڵوێستی چینی بۆرژوازی ناسیونالیستی عەرەبی و بۆرژوازی دیموکراتی عەرەبی، هەڵوێستی حزبی شیوعی عێراق دەکات.
بەشی پێنجەم تایبەتە بە گفتوگۆ و دانوستانی نێوان نوێنەرانی کورد و دەسەڵاتدارانی حکومەتەکانی عێراق و دیدگا و تێڕوانینی کورد بۆ ئۆتۆنۆمی.
بەشی شەشەم باسی شەڕی بەعس و ئەنجام و ئاکامەکانی (حوزەیران - تشرینی دووه می ١٩٦٣) دەکات.
بەشی حەوتەم لە بارەی دامەزراندن و دروستکردنی دامەزراوه شۆڕشگێڕییەكانی شۆڕشی ئەیلوولە.
بەشی هەشتەم باس لە شۆڕش له ساڵی ١٩٦٥ تا ١٩٦٩ و شکاندنی ئاگربەست، شەڕی عارفەکان (١٩٦٥-١٩٦٦) و داستانی هەندرێن، ئاگربەستی حوزەیرانی ١٩٦٦، بارودۆخی ساڵانی ١٩٦٦ تا ١٩٦٩، دەستپێکردنەوەی شەڕ له لایەن بەعسەوه له ساڵی ١٩٦٩ دەکات.
بەشی نۆیەم باسی پرسی کورد و شۆڕشەکەی له ڕوانگەی کومەڵگای نێودەوڵەتییەوە دەکات وەک جیهانی عەرەبی و پرسی کورد، هەڵوێستی ئیسرائیلییەكان، هەڵوێستی ئێران و تورکیا و وڵاتانى ديكه و نەتەوه یەکگرتووەکان و هەڵوێستی خاچی سووری نێودەوڵەتی.