پوختەی جێبەجێکار

لەکاتێکدا گواستنەوەی وزەی جیهانی، گۆڕانی هاوپەیمانییە جیۆپۆلەتیکییەکان و چڕبوونەوەی کێبڕکێ، نەزمی وزەی ناوچەیی و نێودەوڵەتی پێناسە دەکەنەوە، هەرێمی کوردستانیش لە دەروازەی وەرچەرخانێکی گرینگدا وەستاوە.  دیمەنەکە ئەوە نیشان دەدات کە داهاتی هایدرۆکاربۆنەکان لە کورتخایەندا بە گرینگ دەمێنێتەوە و سەقامگیریی درێژخایەن پەیوەست دەبێت بە ستراتیژییەکانی فرە-چەشنکردن، چاکسازیی و بەهێزکردنی  دامەزراوەکان، ئینجا یەکگرتن لەگەڵ تۆڕەکانی وزەی جیهانی.

ئەم توێژینەوەیە شیکاری دەکات کە چۆن ڕەوتی داماڵینی کاربۆن لە ئەوڕوپا و کەنداو و ئابوورییە گەورەکاندا بازاڕەکانی وزە لە قاڵب دەدەنەوە، هەم گووشار و هەم دەرفەت بۆ هەرێمی کوردستان دروست دەکات. بە ناڕاستەوخۆ تیشک دەخاتە سەر پێویستی بەپەلەی داڕشتنەوەی وەزارەتەکانی سامانە سروشتییەکان، کارەبا، پیشەسازی و پەیوەندییەکانی دەرەوە بۆ ئەوەی لەگەڵ واقیعی نوێی وزەدا بگونجێت. توێژینەوەکە دەریدەخات کە دەستەبەرکردنی هێڵە متمانەپێکراوەکانی هەناردەکردن، حوکمڕانی باش و بەکارهێنانی دەستپێشخەرییەکانی پەیوەندی ناوچەیی دەتوانێت هایدرۆکاربۆنەکان بگۆڕێت بۆ بزوێنەری خۆڕاگری نەک لاوازی. لە کۆتاییدا ئاسایشی هەرێمی کوردستان بەندە بە توانای مۆدێرنکردنی دامەزراوەکانی، فرەچەشنکردنی سەرچاوەکانی وزە و بوێرکردنی پێگەی خۆی لە چوارچێوەی پەرەسەندنی دیمەنی وزەی جیهانیدا.