ساڵح حسێن موراد، ساڵی ١٩٤٤ په‌یوه‌ندی به‌ ڕێزه‌كانی شۆڕشی دووه‌می بارزان كردووه، له‌ ٣١ی ئاداری ١٩٤٦ له‌ هێزی بارزانى سه‌ر به‌ سوپای كۆماری دیموكراتی كوردستان له‌ مه‌هاباد بووەتە پێشمەرگە، له‌ ٢٣ی ئایاری ١٩٤٧ هه‌ر له‌ ده‌سپێكی ڕێڕه‌و به‌ره‌و یه‌كێتی سۆڤیەت به‌هۆی بۆردومانی فڕۆكه‌ بریندار بووه‌ و شه‌هید بووه‌. ‌‌

سەید سالم تەیب مستەفا، ناسراو بە (سەید سالم سەید حەمید)، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩٢٥ لە کۆیە لەدایکبووە، لە شۆڕشى دووەمى بارزان خەباتکاربووە، لە کۆمارى دیموکراتى کوردستان لە مەهاباد پێشمەرگە بووە، لە شۆڕشى ئەیلوول بەشداریی کردووە، ساڵى ١٩٧٥ لە نەغەدە کۆچى دوایى کردووە.

سەلیم حسێن موراد، پێشمەرگە و هەڤاڵى بارزانى بۆ یەکێتى سۆڤیەت، لە شۆڕشى دووەمى بارزان خەباتکار بووە، لە کۆمارى دیموکراتى کوردستان لە مەهاباد پێشمەرگە بووە، بەشداریى شۆڕشى ئەیلوولى کردووە، ساڵى ١٩٨٧ لە بەحرکە کۆچى دوایى کردووە.

ساڵح عومەر حاجى، ناسراو بە (ساڵح پالانى)، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩١٥ لە گوندى پالانا لەدایکبووە، لە شۆڕشى دووەمى بارزان خەباتکاربووە، لە کۆمارى دیموکراتى کوردستان لە مەهاباد پێشمەرگە بووە، لە هەردوو شۆڕشی ئەیلوول و شۆڕشی گوڵان بەشداریی کردووە، لە پێشمەرگایەتیدا دوو جار برینداربووە.

ساڵح خانۆ عوسمان، پێشمەرگە و هەڤاڵى بارزانى بۆ یەکێتى سۆڤیەت، لە هەردوو شۆڕشى ئەیلوول و شۆڕشى گوڵان بەشداریى کردووە، ساڵى ٢٠١٠ کۆچى دوایى کردووە.

ساڵح تاهیر خەزیران، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩٢٧ لە گوندى سێلکێ لەدایکبووە، لە شۆڕشى دووەمى بارزان خەباتکاربووە، لە کۆمارى دیموکراتى کوردستان لە مهاباد پێشمەرگە بووە، لە شۆڕشی ئەیلوول بەشداریی کردووە، لە پێشمەرگایەتیدا جێگرى سەرلق بووە و جارێک برینداربووە، له ٣١ ته‌مووزی ١٩٨٣ له ئۆپراسیۆنی ئه‌نفالی بارزانییه‌كان له‌لایه‌ن حكومه‌تی عێراق له كۆمه‌ڵگای هه‌ریر شوێنبزر کراوە.

ساڵح حەسەن تەمەر، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩٢٥ لە گوندى شیڤێ لەدایکبووە، لە شۆڕشی ئەیلوول بەشداریی کردووە، ساڵى ١٩٧٥ لە گوندى شیڤێ کۆچى دوایى کردووە.

سادق سلێمان عوسمان، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩١٥ لە گوندى بارزان لەدایکبووە، ساڵى ١٩٦٠ کۆچى دوایى کردووە.

سلێمان لاچ حسێن، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩١٧ لە گوندى سپیندار لەدایکبووە، لە شۆڕشى یەکەم و شۆڕشى دووەمى بارزان خەباتکاربووە، لە کۆمارى دیموکراتی کوردستان لە مهاباد پێشمەرگە بووە، بەشداریى لە شۆڕشى ئەیلوول کردووە و لە پێشمەرگایەتیدا فەرماندەى بەتالیۆن بووە، ساڵی ١٩٦٣ له‌ شه‌ڕی چیای چاپانكی شه‌هید بووه و گۆڕه‌كه‌ی دیار نییه‌‌.

سلێمان فەقۆ حەسەن، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩٣٠ لە گوندى ئیسومەرا لەدایکبووە، لە کۆمارى دیموکراتی کوردستان لە مهاباد پێشمەرگە بووە، بەشداریى شۆڕشى ئەیلوولى کردووە لە شەڕەکانى ئەم شۆڕشەدا برینداربووە، ساڵى ١٩٩٩ لە ئێران کۆچى دوایى کردووە.

سلێمان عەلى یاسین، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩٠٠ لە گوندى سەفتى لەدایکبووە، سێ کوڕى لەلایەن ڕژێمى بەعسەوە ئەنفال کراون، ساڵى ١٩٨٦ لە کۆمەڵگەى قوشتەپە کۆچى دوایی کردووە.

سلێمان یاسین عەلى، پێشمەرگە و هەڤاڵى بارزانى بۆ یەکێتى سۆڤیەت، ساڵى ١٩١٨ لە گوندى شیڤێ لەدایکبووە، لە کۆمارى دیموکراتی کوردستان لە مهاباد پێشمەرگە بووە و بەرگریى لە کۆمار کردووە، ساڵى ١٩٥٥ لە یەکێتى سۆڤیەت کۆچى دوایی کردووە.