شەهید یاسین محەمەد، لە ساڵی ١٩٦٩ لە گوندی گردە نازێی دەشتی شارەزوور لە دایکبووە، گوندنشین بووە و سەرقاڵی کاری جوتیاری بووە، تا قۆناغى سەرەتایی خوێندووە.
لە ساڵی ١٩٨٥ بۆتە پێشمەرگە لە مەفرەزەی عومەر غەمگین بەرپرسی ڕێکخراوی خورماڵی سەربە لێژنە ناوچەی هەڵەبجەی لقی چواری پارتی دیموکراتی کوردستان، لە هەمانکاتدا عومەر غەمگین بەرپرسی مەفرەزەی پارتیزانی هێزی سورێن بووە.
شەهید یاسین بەشداری شەڕی ئەحمەد ئاوا، شەڕی دەربەندیخان، شەڕی چیای گوڵان، چالاکییە پارتیزانیەکانی دەشتی شارەزوور کردووە.
لە ساڵی ١٩٨٧ یاسین و حەوت هاوسەنگەری هێرشیان کردووە بۆ گرتنەوەی بارەگایەکی سەربازی ڕژێمی بەعس لە گوندی بانی شاری سەربە دەشتی شارەزوور، چواردەوری بارەگا سەربازیەکەیان گرتووە و کە نزیک بوونەتەوە کەوتوونەتە کێڵگەی مینی چێندراو، لە ئەنجامدا یاسین و هاوسەنگەرانی شەهید بوونە. دواتر لە ڕێگەی چەند هاوسەنگەرێکییانەوە جەستەکانیان گوازراوەتەوە دەربەندی دزڵی خاکی ئێران و لەوێ بەخاک سپێردراون.
سەرچاوە:
١.ئەرشیفى دەستەى ئینسکلۆپیدیاى پارتى دیموکراتى کوردستان.
