ژیاننامە
کەمال ئەڵایار عەبدوڵا کەریم، ساڵی ١٩٤٧ لە ناحیەی خورماڵی سەر بە پارێزگای هەڵەبجە لە دایکبووە، هەر لە قوتابخانەی خورماڵ ئاستی سەرەتایی تەواو کردووە، بەر سەربازی زۆرە ملێ کەوتووە و ڕەوانەی شارەدێی ڕەواندوز کراوە، لە سەربازی خولی پەرەپێدانی لەبواری ئەندازیاری سەربازی تەواو کردووە و شارەزای تەواوی هەبووە لە دانان و پوچەڵکردنەوەی مینی چێندراو، کەمال ئەڵایار ساڵی ١٩٧٥ شەهید بووە.
خەباتنامە
شەهید کەمال ئەڵایار، ساڵی ١٩٦٨ لە شارەدێی ڕەواندوز چەکێکی لەگەڵ خۆی بردووە و بۆتە پێشمەرگە لە بەتالیۆنی بێتواتەی سەر بە لەشکری دووی پارتی دیموکراتی کوردستان.
داوای گواستنەوەی کردووە و ساڵی ١٩٦٩ گوازراوەتەوە بۆ بەشی ئەندازیاری سەربازی هێزی خەباتی پارتی دیموکراتی کوردستان، کە لەوکاتەدا حەمەی حەمەسەعید سەرپەرشتیاری ئەو بەشەی هیزەکە بووە.
ساڵی ١٩٧٥ دەستەیەک ئامادە کراون بۆ ئەنجامدانی چەند کارێکی بەشی ئەندازیاری سەربازی، لە ٢٢ی ئاداری ١٩٧٥ کەمال ئەڵایار و دەستە هاوسەنگەرەکەی لە چوار دەوری پردی زەڵم سەرقاڵی ڕاپەڕاندنی کارەکەیان دەبن، بەڵام مینێکی چێندراو بەدەست کەمال ئەڵایارەوە تەقیوەتەوە و شەهید بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
