شەهید ڕەسوڵ حەمە ڕەسوڵ، ساڵی ١٩٥٠ لە گوندی جاسەنەی سەربە ناحیەی سورداشی قەزای دووکان پارێزگاى سلێمانى لە دایکبووە، گوندنشین و سەرقاڵی کاری جوتیاری و ئاژڵداری بووە، تا قۆناغى سەرەتایی خوێندووە، خیزاندار بووە.
ساڵی ١٩٦٩ پەیوەندى بە هێزى پێشمەرگەی شۆڕشی ئەیلوول کردووە و لە لقی سوارە فەتاحی سەربە هێزی ڕزگاری پارتی دیموکراتی کوردستان بۆتە پێشمەرگە. لە شۆڕشی ئەیلوول بەشداری شەڕی دووکان، شەڕی کلکەسماق، شەڕی بازیان، شەڕی پیرەمەگرون و شەڕی گردی حاجی سلێمانی کردووە.
لە ٢٤ی نیسانی ١٩٧٤ ڕەسول حەمە و پەلێک هاوسەنگەری بە فەرماندەیی کوێخا سمایلی تەلان هێرشیان کردووە بۆ گرتنەوەی ڕەبایەی سەربازی سوپاى عێراق لە گردی حاجی سلێمان کە دەکەوێتە نێوان گوندەکانی جاسەنە و چەمچوغە لە سنووری ناحیەی سورداشی سەربە قەزای دووکان، لە ئەنجامی ئەو هێرشەدا عوسمانە سور شەهید بووە و ڕەسوڵ حەمە بە سەختی بریندار بووە، دواتر هاوسەنگەرانی بۆ وەرگرتنی چارەسەری دەیگوازنەوە وڵاتی ئێران، دوای ١٣ ڕۆژ مانەوەی لە نەخۆشخانەی شاری شنۆ بە هۆی سەختی برینەکەیەوە ڕەسوڵ حەمە شەهید بووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
