ژیاننامە
ئاوات عەلی محەمەد عەزیز ناسراو بە ئاوات زەڵمی، ساڵی ١٩٥٥ لە گوندی زەڵمی سەر بە ناحیەی خورماڵ لە دایکبووە، گوندنشین بووە و قۆناغی خوێندنی سەرەتایی لە زەڵم تەواو کردووە، بۆ خوێندنی قۆناغی ناوەندی ڕووی کردۆتە ناحیەی خورماڵ، ئاوات زەڵمی لەگەڵ بنەماڵەکەی لە دوای نسکۆی شۆڕشی ئەیلوول ئاوارەی وڵاتی ئێران بوونە و لە خوڕەم ئاوای سەر بە پارێزگای کەرەج نیشتەجێ بوونە، ساڵی ١٩٨١ شەهید بووە.
خەباتنامە
شەهید ئاوات زەڵمی، ساڵی ١٩٨٠ بۆتە پێشمەرگە لە بەتالیۆنی یوسف زەڵمی کە سەر بە هێزی سورێنی پارتی دیموکراتی کوردستان بووە و لەوکاتەدا مەلا عومەری بانی بنۆک فەرماندەی هێز بووە، ئاوات زەڵمی بۆتە هەڵگری جیهازی لاسرکی (BRC7)ی بەتالیۆن، به‌شداری ساڵی ١٩٨٠ شەڕی داڵان و شیره‌مه‌ڕ و ساڵی ١٩٨١ شه‌ڕی چیای شه‌رام و شه‌ڕی ڕه‌زه‌ڵه و پاڕه‌زانی كردووه، لە شەڕی شیرەمەڕ لە ساڵی ١٩٨٠ لە ئەنجامی تۆپبارانی ڕژێمی بەعس بۆ سەر سەنگەرەکانی پێشمەرگە ساچمه تۆپێك بەر باڵی چەپی کەوتووە و بریندار بووە.
ساڵی ١٩٨١ پلەی فەرماندەی کەرتی دووی بەتالیۆنی وەرگرتووە، لە ١٦ی ئەیلوولی١٩٨١ لە شەڕی ڕەزڵەو پاڕەزان لە نزیک ناحیەی ناڵپارێزی سەربە قەزای پێنجوێن، کە ڕووبەڕووی هێرشی حزبێكی به‌كرێگیراوی كورد بە هەماهەنگی سوپای ڕژێمی بەعس بۆ سەر سەنگەری هێزی پێشمەرگە بوو، ئاوات زەڵمی فیشەکی بەرکەوتووە و شەهید بووە، هەروەها لەگەڵ ئەودا چەند هاوسەنگەرێکی بەناوەکانی عومەر سابیر سەعید، عەزیز هێڵامپێی، فازڵ حەمەکەریم ڕەحمان، عەبدولڕەحمان بەشارەتی، حەمەشەریف فەتاح، ئەبوبەکر عەبدوڵا حەمەسەعید و نامیق لەو سەنگەرەدا شەهید بوون.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
