شەهید نوری ئەحمەد حەمەلاو، ساڵی ١٩٥٢ لە گوندی خاوی سەربە قەزای قەرەداغی پارێزگاى سلێمانى لە دایکبووە، گوندنشین و سەرقاڵی کاری جوتیاری و ئاژەڵداری بووە، تا قۆناغى سەرەتایی خوێندووە، خێزاندار و خاوەنی یەک کور بووە.
نوری ئەحمەد حەمەلاو، ساڵی ١٩٦٧ پەیوەندی بە هێزى پێشمەرگەى شۆڕشی ئەیلوولەوە کردووە و لە لقی کوێخا ئۆمەر سەربە بەتالیۆنی ٥ی زێوێ بەفەرماندەیی ئەنوەر ئەزوەر سەر بە هێزی ڕزگاری پارتی دیموکراتی کوردستان بۆتە پێشمەرگە. بەشداری شەڕی دەربەندیخان، شەڕی دەڤەری سەنگاو، شەڕی چیای گوڵان، شەڕی چیای قەرەداغ و شەڕی چیای زۆزک کردووە، ساڵی ١٩٦٩ پلەی سەرپەلی وەرگرتووە.
سالی ١٩٧٤ دوای هێرشکردنیان بۆسەر چەند ڕەبایەیەکی سەربازی ئەوکاتی عێراق لە چیای زۆزک، لەلایەن تۆپخانەکانی ڕژێمی ئەوکاتی عێراقەوە بە چڕی تۆپبارانی سەنگەرەکانی هێزی پێشمەرگە کراوە و لە ئەنجامی ئەو تۆپبارانەدا، نوری ئەحمەد حەمەلاو شەهید بووە و لەلایەن هاوسەنگەرانى تەرمەکەى دەگوازرێتەوە دەشتی شارەزوور و لە گۆرستانی قەزای سەیدسادق بە خاکیان سپاردووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
