مستەفا حسێن محەمەد باپیر، ناسراو بە (مستەفا ئامێدی و مودیر)، ساڵی ١٩٣٩ لە قەزای ئامێدی پارێزگای دهۆک لەدایک بووە، ساڵى ١٩٦١ پەیوەندى بەهێزی پێشمەرگەى شۆڕشی ئەیلوول کردووە و بۆتە پێشمەرگە، هەر لەهەمان ساڵدا بەشداری شەڕی گەلی زاویتە لە ناوچەی دهۆک و دەشتی دووبان لە ناوچەی زاخۆ کردووە، لەهەمان کاتدا فێری کارکردن بە مۆرس کراوە و بووەتە بەرپرسی بێتەل. دواى پێکهێنانى هێزى بادینان، مستەفا ئامێدی ئەرکی سەرپەرشتیکردنی ئامێرەکانی بێتەلی ئەو هێزەی لەشکری بادینانی پێ سپێردرا و لەگەڵ ئەسعەد خۆشەوی بوو، تا ساڵی ١٩٧٥ بەردەوام بوو لە ئەرکەکەى.
ساڵى ١٩٧٥دوای نسکۆی شۆڕشی ئەیلوول ڕوودەکاتە ڕۆژهەڵاتی کوردستان و لە ئوردۆگای زێوە نیشتەجێ دەبێت، بەرلە هەڵگرتنی ئەو ئوردۆگایە (کۆمەڵگا) لەلایەن حکومەتى ئێران، مستەفا ئامێدی دەگواستریتەوە بۆ شاری سمنان، ساڵى ١٩٧٩ دوای ڕووخاندنی ڕژێمی شای ئێران و هاتنى سەر دەستهەڵاتی ڕژێمى کۆماری ئیسلامى، دەگەڕێتەوە بۆ شاری ورمێ و خێزانەکەی لەوێ نیشتەجێ کردووە، خۆی چووە ئوردۆگای زێوە و ئەرکی پەیوەندی مەکتەب سیاسی لەگەڵ لق و هێزەکانی پێشمەرگە لەڕێگەی ئامێری بێتەل بەڕێوەبردووە، سێ خولی پەروەردەیی بۆ کادیرانی بەشی بێتەلی کردۆتەوە و ژمارەیەک کادیری فێری بەکار‌هێنانی ئامێری بێتەل و کارکردن بە مۆرس کردووە.
ساڵى ١٩٩١ دوای ڕاپەڕینەکەی باشووری کوردستان، لەگەڵ مەکتەبی سەرۆک مەسعود بارزانی گەڕاوەتەوە بۆ پیرمام و لەوێ درێژەی بەخەباتی خۆی داوە، هەر لەهەمان ساڵدا لەلایەن مەکتەبی سیاسی کراوەتە ئەندامی لێژنەی بەڕێوەبردنی کاروباری پەیوەندییەکانی بێتەل.
لە ١٦ی ئابی ١٩٩٦ لە یۆبیلی زێڕینی پارتی دیموکراتى کوردستان، بەهۆی ئەو خزمەتانەی پێشکەشی کردوون، لەلایەن سەرۆک مەسعود بارزانی مەدالیای بارزانی پێ بەخشراوە.
مستەفا ئامێدی له ٣ـی نیسانی ٢٠٢٣ لە تەمەنی ٨٤ ساڵیدا کۆچی دوایی کردووە.
سەرچاوە:
١-ئەرشیفى دەستەى ئینسکلۆپیدیاى پارتى دیموکراتى کوردستان.
