شەهید قاسم تەها شەریف ناسراوەبە قاسم ئەبو شوارب لە ساڵی ١٩٣٤ لە گوندی تۆپ زاوای سەربە ناحیەی یایچی سەربە پارێزگای کەرکووک لە دایکبووە، گوندنشین بووە و سەرقاڵی کاری جوتیاری بووە، ئاستی خوێندەواری سەرەتایی بووە، قاسم ئەبو شوارب خێزاندار بووە و خێزانی ناوی بەدریە فەتحوڵا بووە، خاوەنی پێنج کوڕ و دووکچ بووە.
لە ساڵی ١٩٦٢ پەیوەندی بە شۆڕشی ئەیلوولەوە دەکات و دەبێتە پێشمەرگە لە بەتالیۆنی لەتیف حەمەڕەش کە سەربە هێزی ڕزگاری پارتی دیموکراتی کوردستان بووە، لە ساڵی ١٩٦٣ لە هەمان بەتالیۆن پلەی سەرپەلی وەرگرتووە.
لە ساڵی ١٩٦٥ بە بڕیاری سەرکردایەتی شۆڕش، قاسم ئەبوشوارب دەگوازرێتەوە هێزی قەرەداغ و پلەی سەرلقی بارەگای هێزی وەرگرتووە، هەروەها بەشداری کارای هەبووە لە داستانەکانی سنووری هێزەکەی کە دیارترینیان داستانی کفری و داستانی قەرەداغ و داستانی بەمۆیە.
لە ساڵی ١٩٦٨ لە سنووری ناحیەی بازیانی سەربە پارێزگای سلێمانی لە ڕووبەڕووبوونەوەی سەربازی ئەوکاتی عێراق فیشەک بەر ئەژنۆی ڕاستی کەوتووە و بە سەختی بریندار بووە، هەربۆیە لەلایەن فەرماندەی هێزەوە ڕەوانەی وڵاتی ئێران کراوە و ماوەی ٧ مانگ لە نەخۆشخانەی تاران چارەسەری وەرگرتووە، بەڵام ئەژنۆی ڕاستی هەر لە دەست داوە.
لە ١٤ی ئابی١٩٧٤ قاسم ئەبوشوارب و دەستەیەک هاوسەنگەری هێرش دەکەن بۆ گرتنەوەی ڕەباییەی چیای تەیناڵ لە سنووری پارێزگای سلێمانی، کە ڕەباییەکی گرنگی ڕژێمی ئەوکاتی عێراق بووە و باڵادەست بووە بەسەر شەقامی سەرەکی نێوان پارێزگای کەرکووک و پارێزگای سلێمانی، دوای ڕووبەڕووبوونەوە و تەواو نزیکبوونەوە لە سەنگەری سەربازانی ئەوکاتی عێراق، قاسم ئەبوشوارب مینی چێندراوی ژێر سەنگەرەکەی پێدا تەقیوەتەوە و بە سەختی بریندار بووە کە هەردوو قاچ و بەشێکی تر لە جەستەی لە دەست داوە، هاوسەنگەرانی دەیگوازنەوەی گوندی داری کەلی سەربە ناحیەی بازیان بۆ وەرگرتنی چارەسەر، بەڵام دوای ٢٠ کاتژمێر لە برینداربوونی بە هۆی سەختی برینەکەیەوە شەهید بووە و دواتر هەر لە گۆرستانی گوندی داری کەلی بە خاکیان سپاردووە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
