ژیاننامە
عەبدوڵا محەمەد کەریم هاجی، ساڵی ١٩٣٢ لە گوندی جەمەڕەشی دەڤەری شەمێرانی سەر بە قەزای دەربەندیخان لەدایکبووە، گوندنشین بووە و سەرقاڵی کاری جوتیاری بووە، عەبدوڵا محەمەد خێزاندار بووە و خێزانی ناوی ئۆبا محەمەد بووە و خاوەنی دوو کوڕ بووە بەناوەکانی هادی و مەهدی، لە ساڵی ١٩٦٨ شەهید بووە.
خەباتنامە
شەهید عەبدوڵا محەمەد، ساڵی ١٩٦١ بۆتە پێشمەرگە لە هێزی شەمێران، کە لەوکاتەدا هێزی شەمێران هێزێکی سەربەخۆ بووە و شەهید حەمە شەمێرانی فەرماندەی بووە و فەرمانی لە سەرکردایەتی شۆڕشەوە وەرگرتووە، هەروەها سنووری چالاکی ئەم هێزە لە دەڤەری شەمێران و دەڤەری نەوڕۆڵی بووە زیاتر، بەڵام دوای دروستکردنی پێکهاتەی سەربازی شۆڕشی ئەیلوول لە ساڵی ١٩٦٥ ئەم هێزە هەر وەک هێزێکی سەربەخۆ مایەوە و خرایە سەر هێزی خەباتی پارتی دیموکراتی کوردستان. بەشداری شەڕەکانی چیای زمناکۆ، شەڕی دەربەندیخان، شەڕەکانی دەشتی شارەزوور و شەڕی هەڵەبجە کردووە.
لە ١٦ی حوزەیرانی ١٩٦٨ كورده به‌كرێگیراوه‌كانی ڕژێم کۆڵوانە سور هێرشیان کردۆتە سەر سەنگەرەکانی پێشمەرگە لە دەڤەری شەمێران و چیای زمناکۆ، عەبدوڵا محەمەد کەریم لە سەنگەری گوندی کانی کەوەی دەڤەری شەمێران فیشەکی بەرکەوتووە شەهید بووە، هەر لەو هێرشەی کۆڵوانە سورەکان حەمە شەمێرانی بەسەختی بریندار بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
