شەهید عەبدوڵا حەمەڕەشید ناسراو بە عەبدوڵای حاجی ڕەشید زێوێ، لە ساڵی ١٩٣٧ لە گوندی زێوێی سەربە ناحیەی سەرچناری قەزای دووکان پارێزگاى سلێمانى لە دایک بووە، گوندنشین و سەرقاڵی کاری جووتیاری و ئاژەڵداری بووە، تا قۆناغی سەرەتایی خوێندوویەتی، خێزاندار و خاوەنی دوو کوڕ و یەك کچ بووە.
شەهید عەبدوڵا حەمەڕەشید، ساڵی ١٩٦٤ پەیوەندى بە هێزى پێشمەرگە شۆڕشی ئەیلوول کردووە و لە لقی شەهید مەلا ڕەسوڵ سەربە هێزی ڕزگاری پارتی دیموکراتی کوردستان بۆتە پێشمەرگە. بەشداری شەڕەکانی سپیلک، دووکان، تاسلوجە، قوڵە پوشینە، ئاخجەلەر، خڕەی زێوێ، شەڕەکانی سەر ڕێگای نێوان دووکان- سلێمانی کردووە، دوو جار بریندار بووە، لە شەڕی زنجیرەی دووکان لە ساڵی ١٩٦٧ فیشەک بەر باڵی ڕاستی کەوتووە، ساڵى ١٩٦٩ لە بۆسەی شەقامی نێوان ئاخجەلەر و کەرکووک، فیشەک بەر ڕانی چەپی کەوتووە. ساڵی ١٩٦٨ پلەی سەرپەلی وەرگرتووە.
لە دوای ڕێکەوتنی ١١ی ئاداری١٩٧٠ و دامەزرانی فەوجەکانی پاسەوانى سنوور، پلەی ئامر فەسیڵی لە سریەی ٣ی فەوجی ٦ی سورداش وەرگرتووە.
ساڵی ١٩٧٤ دوای دەستپێکردنەوەی شەڕ لەلایەن سوپاى عێراق دژى هێزی پێشمەرگەى شۆڕشی ئەیلوول، عەبدوڵا حەمەڕەشید پەیوەندی بە شۆڕش کردۆتەوە و پلەی سەرلقی لە بەتالیۆنی سێی سورداشی هێزی ڕزگاری وەرگرتووە، هەر لە هەمان ساڵدا پلەی جێگری فەرماندەی بەتالیۆنی وەرگرتووە.
لە ١١ی نیسانی ١٩٧٤ عەبدوڵا حەمەڕەشید فەرماندەیی هێزێکی ١٤٥ پێشمەرگەیی کردووە بۆ ڕووبەڕووبوونەوەی ئەو هێزە سەربازیەی کە لە شاری کەرکووکەوە بەرەو سلێمانی و شارەزوور کەوتۆتە ڕێ، عەبدوڵا حەمەڕەشید و هاوسەنگەرنی لە نزیک بازگەی تاسلوجە، بۆسەیان بۆ هێزەکە داناوە و هەر لەوێدا ڕووبەڕووبوونەوەیەکی سەختی چەند کاتژمێری لە نێوانیان دروست بووە، لە ئەنجامدا عەبدوڵا حەمەڕەشید شەهید بووە و هاوسەنگەرانی تەرمەکەیان گواستۆتەوە گوندی زێوێ و لەوێ بەخاکیان سپاردووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
