شەهید عوسمان ئەحمەد ناسراو بە (عوسمانە سور)، ساڵی ١٩٤٩ لە گوندی گەڵنێری سەربە قەزای دووکانی پارێزگای سلێمانی لە دایکبووە، گوندنشین و سەرقاڵی کاری جوتیاری و ئاژەڵداری بووە، تا قۆناغى سەرەتایی خوێندووە، خێزاندار بووە و خاوەنی دوو کوڕ و یەک کچ بووە.
ساڵی ١٩٦٨ پەیوەندى بە هێزى پێشمەرگەی شۆڕشی ئەیلوول کردووە و لە قوەتی تەلان بە فەرماندەیی کوێخا سمایلی تەلان، سەربە هێزی ڕزگاری پارتی دیموکراتی کوردستان بۆتە پێشمەرگە. لە شۆڕشی ئەیلوول بەشداری شەڕی سەرگەڵو و بەرگەڵو، شەڕی تەلان، شەڕی دووکان، شەڕی دەربەند بازیان، شەڕی کلکەسماق و شەڕی گردی حاجی سلێمان کردووە.
لە ٢٤ی نیسانی ١٩٧٤ عوسمانە سور و پەلێک هاوسەنگەری بە فەرماندەیی کوێخا سمایلی تەلان هێرشیان کردووە بۆ گرتنەوەی ڕەبایەی سوپاى عێراق لە گردی حاجی سلێمان کە دەکەوێتە نێوان گوندەکانی جاسەنە و چەمچوغە لە سنووری ناحیەی سورداشی سەربە قەزای دووکان، لە ئەنجامی ئەو هێرشەدا عوسمانە سور شەهید بووە و هاوسەنگەرانی لە گۆڕستانی گوندی سەرمۆرە بە خاکیان سپاردووە.
سەرچاوە:
١- ئەرشیفی دەستەى ئینسکلۆپیدیاى پارتى دیموکراتى کوردستان.
