شه‌هید عابید ڕەحیم عەبدوڵا محەمەد، ساڵی ١٩٦٤ لە ناحیەی بیارەی سەربە پارێزگای هەڵەبجە لە دایکبووە، قۆناغەکانی خوێندنی سەرەتایی و ناوەندی لە بیارە خوێندووه و بۆ خوێندنی قۆناغی ئامادەیی کشتوکاڵ چۆتە شاری سلێمانی، ساڵی ١٩٧٩ چۆتە وڵاتی ئێران و بۆتە پێشمەرگە لە مەفرەزەی شەهید عەریف یونس عەلی کەسەربە بەتالیۆنی محەمەدی ڕەمەزان بووە و بەتالیۆنەکەش سەربە هێزی هەورامانی پارتی دیموکراتی کوردستان بووە.
ساڵی ١٩٨١ عابید ڕەحیم لەگەڵ هاوسەنگەرانی بەناوەکانی یونس عەلی و عەریف یونس و حەمە زەمەقی بۆ چالاکییەکی پارتیزانی چونەتە دەشتی شارەزوور، شەوێک بۆ پشوودان لە گوندی خێڵی حەمەی دەشتی شارەزوور ماونەتەوە، لەگەڵ خۆر هەڵاتندا هێزێکی زۆری سەرباز و جاشی ڕژێمی بەعس چوار دەوری گوندەکەیان گرتووە، داوای خۆ بەدەستەوەدانیان لێکردوون و مەفرەزە سێ پێشمەرگەییەکە بڕیاریان داوە ڕووبەڕوویان ببنەوە، ڕووبەڕووبوونەوە دروست بووە و دوای چەند کاتژمێرێک هاوسەنگەرێکیان بەناوی حەمە زەمەقی شەهید بووە و قۆڵەکەی چۆڵ ماوەتەوە، دواتر چواردەوری عابید ڕەحیم و یونس عەلی و عەریف یونس دەدەن و بە برینداری دەستگیریان کردوون، زانیاریەکی سەرەتایی هەیە کە لە گرتووخانەی شاری موسڵ بیندراون، بەڵام لە دوای ئەوەوە تا ئێستاش بێ سەروشوێنن، عابید ڕەحیم یەکێکە لەو عابید ڕەحیم عەبدوڵا محەمەد لە ساڵی ١٩٨١ بێ سەروشوێن بووە.
سەرچاوە:
- ئینسکلۆپیدیای پارتی دیموکراتی کوردستان.
