ژیاننامە
شێروان حەمید حەمەدئەمین قادر لە ساڵی ١٩٦٣ لە شارۆچکەی شەقڵاوە لەدایکبووە، قوتابی قۆناغی ئامادەیی بووە لە ئامادەیى شەقڵاوە. دایکى ناوى قەدریە سعید قادر بووە، خاوەنی سێ برا بووە بە ناوەکانی شوان حەمید، مەریوان حەمید، کامەران حەمید و چوار خوشکیشى هەبوون بە ناوەکانی پەخشان، رێزان، بەهار، ڤیان. شێروان حەمید خێزاندار نەبووە و سەرقاڵی خوێندن و کاری سیاسی بووە.
خەباتنامە
شێروان حەمید لە قۆناغی خوێندنی ئامادەیی پەیوەندی بە ریزەکانی یەکێتی قوتابیانی کوردستان کردووە و یەکێک بووە لە ئەندامە چالاکەکانی ئەم رێکخراوە لە شارۆچکەی شەقڵاوە.
لەهەمانکاتدا باوکی ناوبراو پەیوەندییەکی باشی هەبووە لەگەڵ پێشمەرگەکانی دۆڵى بالیسان، بۆیە مانگانە چەند جارێک ناوبراو نامە و کەلوپەلی پێویستی گەیاندووەتە هێزی پێشمەرگە.
پێشڕەوی خۆپێشاندەرانی ساڵی ١٩٨٧ی قەزای شەقڵاوەى کردووە، ڕۆژێک دوای خۆپێشاندانەکە خۆی و تەواوی ئەندامانی خێزانەکەی دەستگیردەکرێن، دوای یەک مانگ لە دەستگیرکردنیان لە ئەمنی هەولێر خۆی و باوکی لە سێدارە دەدرێن و شەهید دەبن و هەر ئەمن خۆی لە گۆڕستانێکی بە کۆمەڵ لە شاری هەولێر بە خاکیان دەسپێرن، تا ساڵی ١٩٩١ گۆڕە بە کۆمەڵەکە هەڵدەدەنەوە و هەر بنەماڵە و شەهیدی خۆی لەو شوێنە بەخاکدەسپێرێتەوە کە خۆى دەیەوێ.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
