ژیاننامە
مەولود رەسوڵ عەبدوڵا، لە ساڵی ١٩٤١ لە قەزای مەخمور لە دایکبووە، تا قۆناغی سه‌ره‌تایی خوێندوویه‌تی، سەرقاڵی کاری جوتیاری بووە، خێزاندار بووه خێزانه‌كه‌ی ناوی نەجیبە عەزیز بووە و خاوه‌نی دوو كوڕ بووه به‌ناوه‌كانی هەڵگورد و هەندرێن.
خەباتنامە
مەولود رەسوڵ عەبدوڵا، لە ساڵی ١٩٦١ بۆتە پێشمەرگە لە بەتالیۆنی فارس باوە سەربە هێزی دەشتی هەولێر، بەهۆی قارەمانی و چاونەترسی هەرزوو دەبێتە جێگەی متمانەی فارس باوە و دەینێرێت بۆ خزمەتی کاک ئیدریس بارزانی و دەبێتە پێشمەرگە لە دەستەی چالاکیەکانی ناوشاری هەولێر کە ڕاستەوخۆ فەرمانیان لە کاک ئیدریس وەرگرتووە، وە دواتر لەگەڵ هەریەک لە سەید کاکە و ئەکرەم مەنتک چەند جارێک بۆ ئەرکی تایبەت دەچنە ناو شاری هەولێر و بە سەرکەوتوی ئەرکەکەیان جێبەجێ دەکەن و دەگەرێنەوە لای کاک ئیدریس.
شه‌هید مەولود رەسوڵ عەبدوڵا، پێشمه‌رگه‌یه‌كی چالاك بووه، چه‌ندین ئه‌رك و چالاكی نهێنی ئه‌نجام داون، کۆدی دەستەکەیان (جۆ بکرین) بووە کە زۆربەی چالاکیەکانیان بەو کۆدە دەست پێکردووە، دواتر پلەی فەرماندەی دەستەی چالاکی ناوشار و پلەی فەرماندەی بەتالیۆن وەردەگرێت.
لە ساڵی ١٩٧٥ هێزێکی زۆری سوپای ڕژێم هێرش دەکاته سەر سەنگەرەکانی پێشمەرگە لە چیای ماکۆک، دوای تێکشکانی هێرشەکەو پاشەکشەی سەربازەکان بە سەختی بۆردوومانی سەنگەرەکانی پێشمەرگە کراوە، شه‌هید مەولودە سۆر لەو بۆردوومانە تۆپێکی بەرکەوتووە و شەهید بووە، هەر ئەوڕۆژە و دوای ئاسایی بوونەوەی دۆخەکە هاوسەنگەرانی لە چیای ماکۆک بە خاکی دەسپێرن.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
