سەلام عارف، لە ساڵی ١٩٦٤ لە گوندی گردە نازێی دەشتی شارەزووری سەربە ناحیەی خورماڵ لە دایکبووە، گوندنشین بووە و سەرقاڵی کاری جوتیاری بووە، قوتابی قۆناغی ناوەندی بووە، لە ساڵی ١٩٨١ پەیوەندی بە شانەی نهێنی شەهید ئەکرەم حەمەعەلی سەربە ڕێکخستنە نهێنیەکانی لێژنەی ناوچەی هەڵەبجەی لقی چواری پارتی دیموکراتی کوردستان کردووە، کە لەوکاتەدا شەهید ئەکرەم حەمە عەلی کادری ڕێکخستنی لێژنە ناوچەی هەڵەبجە بووە.
شەهید سەلام عارف لە ساڵی ١٩٨١ چەکی هەڵگرتووە و بۆتە پێشمەرگە لە ڕێکخراوی باڵانتەران بە بەرپرسیاریەتی مام والی حاجی عارف سەربە لێژنە ناوچەی هەڵەبجە. لە بەرواری ١ی تشرینی یەکەمی ١٩٨٣ سەلام عارف و مام والی حاجی عارف بۆ ئەنجامدانى چالاکییەکی پارتیزانی چوونەتە ناو شارى سەیدسادق، لە کاتى گەڕانەوە لە دەروازەی سەیدسادق کەوتوونەتە بۆسەی سەرباز و جاشی ڕژێمی بەعس و ڕووبەڕووی هێزەکەی دوژمن بوونەتەوە و نزیکى شەش کاتژمێر بەرگریان کردووە، بەڵام بەهۆی گەیشتنی هێزی پاڵپشتی بۆ جاش و سەربازەکانی بەعس، لەئەنجامدا سەلام عارف شەهید بووە و مام والی حاجی عارف بە برینداری خۆی دەرباز کردووە لە بۆسەکە.
سەرچاوە:
١.ئەرشیفى دەستەى ئینسکلۆپیدیاى پارتى دیموکراتى کوردستان.
