شەهید سالار محەمەد عەبدولکەریم محەمەد، ساڵی ١٩٦٨ لە شاری کەرکووک لەدایک بووە، لەساڵی ١٩٧٥ دوای نسکۆی شۆڕشی ئەیلوول لەگەڵ خێزانەکەی دووردەخرێنەوە بۆ شاری سلێمانی، تا پۆلی دووەمی ناوەندی خوێندووە.
هەر لە تەمەنی گەنجی خولیای کاری ڕێکخستن بووە، لە ساڵانی ١٩٨٢و ١٩٨٣ هاوکاری شەهید ساڵح محەمەدی برای بووە لە کاری ڕێکخستن بەتایبەتی لە هێڵی ١٣ی ناو شاری سلێمانی، لەساڵی ١٩٨٤ بۆتە پێشمەرگە لە ڕێکخراوی بەرزنجە سەربە لێژنەی ناوچەی چوارتا لە سنووری لقی٤، بەشداری چەندین چالاکی کردووە، لە ئابی ساڵی ١٩٨٥، کە بۆ ئەرکێکی پارتایەتى دێتە ناو شاری سلێمانی، لەلایەن دەزگاکانی ڕژێمی بەعسەوە دەستگیر دەکرێت و دواتر ڕەوانەی بەندیخانەی فەزیلە لە بەغدا کراوە، لەوێوە لەگەڵ ٥٠ زیندانی تر گواستراوەتەوە بۆ ئەمنی بەغدا، یەکێکە لەو شەهیدانەى گۆڕى نادیارە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
