ژیاننامە
زیاد وەلی سدیق حسێن لە ساڵی ١٩٤٦ لە شارەدێی کۆڕێ لەدایکبووە، قۆناغی سه‌ره‌تایی و ناوه‌ندی هه‌ر له‌و شاره‌دێیه ته‌واو كردووه، پەیمانگای پیشەسازی لە شاری هەولێر تەواوکردووە، دواتر بووەتە فەرمانبەر لە گەشتوگوزاری سەیرانگای سەری ڕەش، لە بەرواری ١١ی ئاداری ١٩٩١ دوای ئەوەی سەربازگەی هەولێر کۆنترۆڵ دەکەن و دەچنە ناویەوە، فڕۆکەکانی ڕژێم بۆمبارانی سەربازگەکە دەکەن و ناوبراو شەهید دەبێت.
خەباتنامە
شه‌هید زیاد وەلی سدیق حسێن، لەوکاتەى لە ساڵی ١٩٦٩ قوتابى بووە لە پەیمانگای پیشەسازی هەولێر، پەیوەندی بە رێکخستنەکانی یەکێتی قوتابیانی کوردستانەوە کردووە. دوای تەواوکردن و دامەزرانی پەیوەندی هەر دەمێنێت و پەیوەندیی بە ڕێکخراوی پیرمامی سەر بە ناوچەی شەقڵاوەی پارتی دیموکراتی کوردستان دەکات.
بەهۆی بوونی خوێندەوارییەکی باش دەبێتە کادری بەشی ڕێکخستنی ناو شاری ڕێكخراوی پیرمام، لە یەککاتدا کار بۆ ڕێکخراوی یەکێتی قوتابیانی کوردستان دەکات لە قوتابخانە و پەیمانگاکانى سنووری ناوچەی شەقڵاوە و ناو شاری هەولێر، هەروەها کاری ڕێکخستن بۆ ڕێکخراوی پیرمام دەکات لە ناو شار کە ڕاستەوخۆ پەیوەندی لەگەڵ عومەری مەلا زادە، مام رەسوڵ فەقی دەبێت.
لە نێو ساڵانی (١٩٧٩_١٩٨٦) بۆ چەند چالاکییەکی تایبەت لە ناوشار چەکی هەڵگرتووە، لە سەرەتای ساڵی ١٩٩١ دووبارە چەک هەڵدەگرێتەوە و بەشداری ڕاپەرینی گەلی کوردستان دەکات لەگەڵ پێشمەرگەکانی ڕێکخراوی پیرمام، لە بەرواری ١١ی ئاداری ١٩٩١ سەربازگەی شاری هەولێر کۆنترۆڵ دەکەن.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
