ناحیەى بامەڕنێ دەکەوێتە بنارى چیاى مەتینا سەر بە قەزاى ئامێدى لە پارێزگاى دهۆک، لە شۆڕشی ئەیلوولدا شەڕى گەورەى بەخۆوە بینیوە کە دیارترینیان داستانى چیاى مەتینایە، دیارە ئەو داستانە و زۆرانى تر ڕۆڵێکى گەورەیان هێناوەتە ئارا لە ڕەنگڕێژکردنى لاپەڕەکانى مێژوو بەو شەڕ و نەبەردیانەى کە لەسەر دەستى هێزى پێشمەرگە تۆمار کراون بۆ دەستەبەر کردنى ئازادى.   

بەردەوامى خەبات چالاکییەکانى پێشمەرگەى خزاندە هەناوى دەوڵەت لە ناوچە جیاجیاکانى کوردستان لە سەردەمى شۆڕشى گوڵاندا، بە شێوازى پارتیزانى توانرا زەبرى کوشندە بە دامودەزگا سەربازى  و ئەمنیەکانی حکومەتى بەعس بگەیەنێ، داستانى بامەڕنێ یەکێکە لەو هەڵمەتانەى پێشمەرگە کە کردیە سەر مۆڵگە و سەربازگەکانى سوپاى عێراق لە ناوچەى بامەڕنێ شەوى ٢٦ لەسەر٢٧ى ئایارى  ١٩٨٧ لەلایەن هێزى پێشمەرگەى لێژنە ناوچەکانى ئامێدى و دهۆک و شێخان و بەرگرى میللەى ئەنجام درا.

هەرچەندە هێرشەکەى پێشمەرگە شەوێک دوا کەوت بەهۆى پاشگەز بوونەوەى چەکدارانى بەکرێگیراو کە بەڵێنى هاوکاریان دابوو، بەڵام دواتر بە پلانێکى توکمەى سەربازى هەڵکوترایە سەر بارەگاکانى سەربازى سوپاى عێراق لە دەڤەرەکە بە ماوەیەکى کەم دەستیان بەسەر سێزدە سەنگەر و فڕگەى بامەڕنێ و بارەگاى فەوجى پاسەوانانى سنوور و فەوجى ١٤٠دا بگیرێ، زەبرێکى گەورە بەر سەربازانى سوپاى عێراق کەوت کە بریتى بوو لە کۆژرانى زیاتر لە سەد سەرباز و بەدیل گرتنى ٥٨ى دیکە، دەستکەوتەکانى ئەو داستانە بریتى بوون زیاتر لە دووسەد و پازدە پارچە چەکى جۆراو جۆر و زیاتر لە ٢٠١٥٠ فیشەکى جۆراوجۆر، دیارە هێزى پێشمەرگەش بێ زیان نەبوو کە دوو پیشمەرگە شەهید بوون بە ناوەکانى فەوزى ڕەمەزان ڕەشۆ سکرینى و عەبدولسەتار سالح مراد و برینداربوونى سی پێشمەرگەى تر. 

لەو هێرشەدا لە بارەگاى فەوج دەست بەسەر بڕى ٣٢ هەزار دیناردا گیرا، ڕاستەوخۆ پێشمەرگە و بەرپرسان هەستان پارەکەیان کردە دیارى بۆ خانەوادەى شەهیدان، دیارە سەرکەوتنى ئەو داستانە و لێدانى بەهێز لە دەزگا سەربازییەکانى حکومەت مۆڕالێکى گەورە بوو بۆ شۆڕش  و هێزى پێشمەرگە، پەیامێکى بەهێزیش بوو بۆ ڕژێمى بەعس کە شۆڕش بەردەوامە و لە توانایدا هەیە چالاکى گەورە ئەنجام بدات لە هەر شوێنێک ئەگەر مەبەستى بێت.       

سەرچاوەکان:

1. https://www.kurdipedia.org/default.aspx?lng=1&q=20081218012640829

2. هۆژین مەسعود سەرنى، شورەشا ئیلونێ ل دەڤەرا بەهدینان ١٩٦١- ١٩٧٥، چاپى یەکەم، ٢٠١٨.

3. بارزانى و بزوتنەەى ڕزگاریخوازى کورد، بەرگى چوارەم ١٩٧٥ – ١٩٩٠ شۆرشى گوڵان بەشى دووەم چاپى یەکەم، چاپخانەى ڕوکسانا، ٢٠٢١.