خالید عەزەم تۆفیق، ساڵی ١٩٦٠ لە گوندی بەڕوێنی سەربە ناحیەی بەمۆی پارێزگای هەڵەبجە لەدایکبووە، گوندنشین بووە و تا قۆناغی سەرەتایی خوێندووه.
ساڵی ١٩٧٦ بۆتە پێشمەرگە لە لقی شەهید عەزیز تۆفیق عەبدولقادر کەسەربە بەتالیۆنی تاگۆزی بوونە و قادر حەمەساڵح فەرماندەی بەتالیۆن بووە. ساڵی ١٩٧٨ لە نێوان گوندی سێڵە و گوندی پشتەی ناحیەی بەمۆ کەوتوونەتە بۆسەی سەربازی ڕژێمی ئەوکاتی عێراق و خالید عەزەم تۆفیق بە سەختی بریندار بووە.
لە ١٠ی ئەیلوولى ١٩٨٢ خالید عەزەم تۆفیق و مەفرەزەیەک هاوسەنگەری بە فەرماندەیی عەزیز تۆفیق عەبدولقادر دوای گەڕانەوەیان لە چالاکییەکی پارتیزانی ناوشاری هەڵەبجە، لە گوندی گورگەچیای دەڤەری تاگۆزی سەربە پارێزگای هەڵەبجە، هێزێکی زۆری جاش و سەربازی ڕژێمی بەعس چواردەوری گوندەکەیان گرتووە و شەڕ نێوانیان دروست بووە، دوای ڕووبەڕووبوونەوەیەکی چەند کاتژمێری و بەهۆی کەمی ژمارەی پێشمەرگەکان و زۆری سەرباز و جاشی ڕژێم خالید عەزەم تۆفیق و فەرماندەکەی بەناوی عەزیز تۆفیق عەبدولقادر کە مامی خۆی بووە بە برینداری لەلایەن سەربازەکانەوە دەستگیر کراون، دواتر بە فەرمانی هەواڵگری گشتی عێراق هەرلە شەوی ١٠ی ئەیلوولى ١٩٨٢ لە دەروازەی گورگەچیا فیشەک باران کراون و شەهید بوونە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان
