حەبیب کەلەش عەلی خالید، ساڵی ١٩٤٤ لە گوندی باتیفا سەر بە قەزای زاخۆ لەدایک بووە، تا قۆناغى ناوەندى لە شارى زاخۆ خوێندووە، خێزاندارە، ساڵی ١٩٧٥ دوای نسکۆی شۆڕشی ئەیلوول،ئاوارەى وڵاتى ئێران بووە و سەرەتا لە شاری نەغەدە لە ڕۆژهەڵاتی کوردستان نیشتەجێ بووە، دواتر گواستراوەتەوە بۆ شاری خومەین و لەوێشەوە بۆ شاری ئاراک و دواتریش بۆ شاری دلیجان. ساڵی ١٩٩١ دواى راپەڕینى جەماوەرى خەڵکى کوردستان گەڕاوەتەوە باشووری کوردستان و لەشارى دهۆک نیشتەجێ بووە.
ساڵی ١٩٦٢ پەیوەندی بە هێزی پێشمەرگەى شۆڕشی ئەیلوول کردووە و بۆتە پێشمەرگە، لەهەمان ساڵ کراوە بە کادری لێژنەی ناوچەی زاخۆ و بەرپرسی ڕێکخستنی چوار گوندی سەربە ڕێکخراوی زاگرۆسی سەر بە لێژنە ناوچەى زاخۆ بووە.
ساڵی ١٩٦٤ بانگهێشت کراوە بۆ بەشداربوون لە کۆنگرەی چوارەمی پارتی، بەڵام بەهۆی نەخۆشی هاوسەرەکەی نەیتوانیوە بەشداری بکات، لەهەمان ساڵدا کراوە نوێنەری یەکێتی قوتابیانی کوردستان، ساڵی ١٩٦٥ لە سەرکردایەتی شۆڕشی کوردستان لە شارۆچکەی باتیفا بووە، ساڵی ١٩٦٦ بەشداری کۆنگرەی حەوتەمی پارتی کردووە، ساڵی ١٩٦٧ بەرپرسیارێتی ڕێکخراوی ڕزگاری لە لێژنەی ناوچەی سندیان پێ سپێردراوە، ساڵی ١٩٦٨ بەشداری خولی کادیرانی کردووە و دوای تەواوبوونی خولەکە گەڕاوەتەوە بۆ بەرپرسیارێتی خۆی، ساڵی ١٩٦٩ گواستراوەتەوە بۆ دەڤەری زاخۆ و کراوە بە بەرپرسی ڕێکخراوی ئازادی.
دوای ڕێککەوتنی ١١ی ئاداری ١٩٧٠، حەبیب کەلەش بەشداری کۆنگرەی هەشتەمی پارتی دیموکراتى کوردستانى کردووە لەناوپردان، دوای کۆنگرە کراوە بە ئەندامی لێژنەی ناوچەی زاخۆی سەر بە لقى ١ى پارتى دیموکراتى کوردستان و دواتر کراوە بە ئەندامی دەستەی کارگێڕی هەمان لێژنە ناوچە. ساڵی ١٩٧٩ بەشداری کۆنگرەی نۆیەمی پارتی دیموکراتى کوردستانى کردووە،
ساڵی ١٩٨٠ کراوە بە کارگێڕی لێژنەی ناوچەی خەبات، ساڵی ١٩٨١ کراوە بە کارگێڕی لقی یەکی ، ساڵی ١٩٨٦ گواستراوەتەوە بۆ بەشی دارایی مەکتەبی سیاسی پارتی، ساڵی ١٩٨٩بەشداری کۆنگرەی دەیەمی پارتی کردووە.
حەبیب کەلەش ساڵی ١٩٨٩ ئەرکی بەرپرسیارێتی گومرگی قاسمەڕەشی پێ سپێردرا لەگەڵ نوێنەرانی حزبەکانی تری بەرەی کوردستانی، ساڵی ١٩٩٠ کراوەتە بەرپرسی لێژنەی ناوچەی نێروە و ڕێکانی. ساڵى ١٩٩١ دواى دامەزراندنى بارەگاى لق لەناو شارى هەولێر کراوە بە بەرپرسی دارایی لقی دووی پارتی دیموکراتى کوردستان، دواتر گوستراوەتەوە لقى١ لە شارى دهۆک، ساڵی ١٩٩٣ یەکێک بووە لە ئەندامانی لێژنەی ئامادەکاری کۆنگرەی دوانزدەیەمی لە لێژنە ناوچەکانی سنووری لقی یەک لەدهۆک، لەهەمان ساڵدا بەشداری کۆنگرەی دوانزدەیەمی پارتی دیموکراتى کوردستانى کردووە، ساڵی ٢٠٠٢ کراوە بە بەرپرسی ڕێکخستنی لقی یەک لەدهۆک، ساڵی ٢٠٠٥ گواستراوەتەوە بۆ دەزگای شەهیدان، ساڵی ٢٠١٠ بەشداری کۆنگرەی سێزدەیەمی پارتی دیموکراتى کوردستانى کردووە.
لە ١٣ى تشرینى یەکەمى ١٩٩٩ لە کۆنگرەى دوانزدەیەمى پارتى دیموکراتى کوردستان، بە هۆى ئەو خزمەتانەى کە پێشکێشى کردوون، لەلایەن سەرۆک مەسعود بارزانى میدالیاى بارزانى پێ بەخشراوە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
