ژیاننامە
جەمال ڕەسوڵ حەمەڕەشید عەبدوڵا ناسراو بە جەمال ڕەسوڵ بانیشاری، ساڵی ١٩٥٦ لە گوندی بانیشاری سەر بە ناحیەی خورماڵ لە دایکبووە، گوندنشین بووە و سەرقاڵی کاری جوتیاری و ئاژەڵداری بووە، تا قۆناغی سەرەتایی خوێندووە، ساڵی ١٩٨٣ شەهید بووە.
خەباتنامە
شەهید جەمال ڕەسوڵ، ساڵی ١٩٧٨ بۆتە پێشمەرگەی مەفرەزەی عوسمان بانیشاری کە سەربە هێزی هەورامانی پارتی دیموکراتی کوردستان بووە، ساڵی ١٩٨٠ ئەم مەفرەزەیە بۆتە بەتالیۆنی حەوتی هێزی هەورامان.
شەهید جەمال ڕەسوڵ بەشداری شەڕی سێ تەپان، شەڕی چیای شەرام، شەڕی شارباژێر و داستانی گردی بەوشی کردووە، گردی بەوش سەربە ناحیەی خورماڵە هێزێکی شەش کەسی پێشمەرگە کە لە جەمال ڕەسوڵ، عوسمان بانیشاری، عابید فەرەج، ئەڵاکەرەم، مەهدی جەمە و کەمالی کاک ئەحمەد پێکهاتبوون ڕووبەڕووی هێزێکی زۆری ڕژێمی بەعس كه یه‌ك فەوجی ١٨٠ کەسی بوونەوە، لە سەرەتایی خۆرهەڵاتنەوە ڕووبەڕوویان وەستاوبوونه‌وه تا کاتی خۆر ئاوابوون بەبێ بوونی هیچ زیانێکی گیانی لەم شەش پێشمەرگەیە، بەڵام لەبەرامبەردا توانیوییانە ٣١ سەرباز و ٢ ئەفسەری سوپای عێراق بکوژن و ١٩ سەرباز و ٣ ئەفسەری فەوجەکە دەستبەسەر بکەن.
ساڵی ١٩٨٣ شەهید جەمال ڕەسوڵ پلەی سەرپەل و جێگری فەرماندەی کەرتی دووی بەتالیۆنی حەوتی وەرگرتووە، کە لەوکاتەدا شەهید ڕەحیم مەحەمەد (ڕەحیم بانیشاری) فەرماندەی کەرت بووە و عوسمان بانیشاری فەرماندەی بەتالیۆن.
لە بەرواری ٢٧ی تەممووزی ١٩٨٣ لە کونە چەقەڵی پشت ئەحمەدئاوا، لە ئەنجامی تۆپبارانی تۆپخانەکانی ڕژێمی بەعس بۆ سەر سەنگەرەکانی پێشمەرگە، جەمال ڕەسوڵ و هاوسەنگەرێکی بەناوی باسام هەورامی شەهید بوونە و ڕەحیم محەمەد ساڵح شەهید ڕەحیم بانیشاری بەسەختی چاوی بریندار بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
