جەمال ئەسکەندەر مەحمود، ساڵی ١٩٦٥ لە گوندی بانی بنۆکی بناری چیای سورێنی سەربە ناحیەی خورماڵ لە دایکبووە، تاقۆناغی ناوه‌ندی خوێندوویه‌تی، بە هۆکاری پێشمەرگەبوونی باوکی و تەواوی بنەماڵەکەیان لە شۆڕشی ئەیلوول و لە دوای نسکۆش دەستبەردار نەبوونیان لە چەک و درێژەدانیان بە خەباتی کوردایەتی، لە سەر سنوری نێوان ئێران عێراق لە ١ی شوباتی١٩٧٦ تەواوی منداڵ و ئافرەتانی بنەماڵەکەیان لەلایەن ڕژێمی ئەوکاتی عێراقەوە دەستگیر کراون و لە گرتووخانەی ناسڕیە تا ٣ی ئابی١٩٧٨ زیندانی بوونە.
ساڵی ١٩٧٩ لە مەفرەزەی ئەسکەندەر مەحمودی باوکی بۆتە پێشمەرگە، کە سەربە بەتالیۆنی شەهید ئەبوبەکر بانی بنۆکی مامی بووە و سەربە هێزی سورێنی لێژنە ناوچەی دەربەندیخانی لقی چواری پارتی دیموکراتی کوردستان بووە و لەوکاتەدا مەلا عومەری بانی بنۆک فەرماندەی هێزەکە بووە.
بەشداری چالاکییە پارتیزانییەکانی دەشتی شارەزوور و بناری چیای سورێن، شەڕی شارباژێر، شەڕی گردی شەریفی شارەزوور، شەڕی هەڵەبجە، شەڕی ناڵپارێز، شەڕی گوندی قاینێجەی شارەزوور کردووە، لە ساڵی ١٩٨١ لە شەڕی شارباژێر لەگەڵ ڕژێمی ئەوکاتی عێراق فیشەکی بەرکەوتووە و بە سەختی بریندار بووە.
لە ٣ی ئابی ١٩٨٢ لەگەڵ دەستەیەک هاوسەنگەری چوونەتە قەزای سەیدسادق بۆ ئەنجامدانی چالاکی پارتیزانی، دوای گەڕانەوەیان لە نیشینگەی زۆرەملێی شانێری کەوتوونەتە بۆسەی جاش و سەربازی ڕژێمی بەعس، دوای ڕووبەڕووبوونەوە لەگەڵیان جەمال ئەسکەندەر مەحمود فیشەکی بەرکەوتووە و شەهید بووە، هەروەها هاوسەنگەرێکی تری بەناوی ئەحمەد سانە بە سەختی بریندار بووە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
