جەمال عەلی ڕەشید ناسراوە بە جەمالی مەلا عەلی، لە١٠ی نیسانی١٩٥٠ لە گوندی وڵەسمتی بناری چیای سورێنی سەربە قەزای سەیدسادق لە دایکبووە، گوندنشین بووە و سەرقاڵی کاری جوتیاری بووە، تا قۆناغی سه‌ره‌تایی خوێندووه، لە دوای نسکۆی شۆڕشی ئەیلوول ئاوارەی وڵاتی ئێران بووە و لە شاری مەریوان نیشتەجێ بووە.
ساڵی ١٩٦٤ بۆتە کادری ڕێکخراوی سورێنی سەربە لێژنە ناوچەی دەربەندیخانی لقی چواری پارتی دیموکراتی کوردستان، کە لەوکاتەدا عەلی شاوێس بەرپرسی ڕێکخراوی بووە، لە ١ی نیسانی ١٩٧٦ بۆتە پێشمەرگە لە هێزی سورێنی پارتی دیموکراتی کوردستان، کە لەوکاتەدا مەلا عومەری بانی بنۆک فەرماندەی هێزی بووە.
بەشداری شەڕەکانی شیرەمەڕ ساڵی ١٩٧٩، شەڕی ڕیشێن ساڵی ١٩٨٠، شەڕی بێسەڵمێن ساڵی ١٩٨٠، شەڕی قەڵادزێ ساڵی ١٩٨١ ، چالاکی پارتیزانی دەشتی شارەزوور کردووە و دیارترینیان سوتاندنی بنکەی پۆلیسی سەیدسادق بوو بە ئار پی جی لە ساڵی ١٩٧٩.
جەمالی مەلا عەلی لە ژیانی پێشمەرگایەتی دووجار بریندار بووە، لە ساڵی ١٩٧٩ لە شەڕی شیرەمەڕ کە ڕووبەڕووبوونەوە بوو لەگەڵ سەربازی ڕژێمی بەعس بە سەختی بریندار بووە چەند پارچەیەکی تۆپی دوورهاوێژ بەر دەمووچاوی کەوتووە، لە ساڵی ١٩٨١ لە شەڕی قەڵادزێ کە هەر ڕووبەڕووبوونەوەی سەربازی بەعس بوو فیشەک به‌ر باڵی چەپی كه‌وتبوو و بۆ دووەم جار لە ژیانی پێشمەرگایەتی خۆی بریندار بووە.
لە کۆتاییەکانی ساڵی ١٩٧٦ پلەی فەرماندەی مەفرەزەی وەرگرتووە و لە سەرەتاکانی ساڵی ١٩٨١ پلەی فەرماندەی بەتالیۆنی پێنجی هێزی سورێنی وەرگرتووە و لە حوزەیرانی ١٩٨١ پلەی فەرماندەی هێزی سورێنی پارتی دیموکراتی کوردستانی وەرگرتووە.
لە٢٠ی ئابی ١٩٨١ جەمالی مەلا عەلی و مەفرەزەیەکی چەند کەسی هاوسەنگەری لە بارەگای سیامێوەی بناری سورێنەوە ڕوویان کردۆتە دەشتی شارەزوور بۆ کێوماڵ و ئەنجامدانی چەند چالاکییەکی پارتیزانی لە دەشتی شارەزوور، بەڵام لە ٢٣ی ئابی ١٩٨١ لە گوندی ناوگردانی دەشتی شارەزوور کەوتوونەتە بۆسەی هێزێکی یه‌كێتی و دوای ڕووبەڕووبوونەوەیان جەمال جەمالی مەلا عەلی و چەند هاوسەنگەرێکی بە ناوەکانی جەبار محەمەد شەریف، ئەحمەد بانیشاری، جەباری حاجی شەریف، ساڵحی خاڵە شەهید بوونە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
