لە ناو ڕیزەکانى بزوتنەوەى ڕزگاریخوازیدا بوونى مەفرەزەى پارتیزانى پێتڤیەکى شۆڕشگێڕیە، لە نێوەندە جیهانەکانیشدا بە هێزى تایبەت یان هێزى دەستوەشێن ناو دەبرێن، ئەم هێزانە لە ئەندامانی دەستەبژێر و چالاک و چابوک پێکدێن، لە هەراسانکردنى دوژمندا ڕۆلێکى گرنگ دەگێڕین بەو پێیەى کە شوێنى جێگیریان نیە بەڵکو گەڕۆکن، ئەندامەکانیشیان دەستەبژێرن، لە ئەنجامدانى چالاکیدا بەپێى بارو دۆخ و سروشتى ناوچەکە لە جل و بەرگ و ڕوخساردا خۆیان دەگونجێنن، تاکو بتوانن ئەو ئامانجەى کە لە پلانیاندا هەیە بە سەرکەوتوویی بیپێکن.
هاوینى ١٩٧٩ مەفرەزەیەکى پێشمەرگە بە فەرماندەى مەحمود شێخۆ دۆڵەمەرى تاوتوێی چالاکیەکى پارتیزانیان کرد، کە شوێنێک دەستنیشان بکەن گورزێک لە ڕیزەکانى سەربازى سوپاى عێراق بوەشێنن، بۆ ئەنجامدانى ئەو چالاکیە پلانیان داڕشت کە تۆپبارانى سەربازگەى سیدەکان بکەن، بە مەبەستى بەردەوامى چالاکیەکانى شۆڕش و زیانگەیاندن بە بەژەوەندیە سەربازیەکانى ڕژێم و ترس و تۆقین بخەنە ناو ڕیزەکانیان، دەربارەى چۆنیەتى ئەنجامدانى چالاکى پێشمەرگەى شۆڕشى گوڵان عەبدولڕەحمان حاجى بەشداربووى چالاکیەکە بۆمانى گێڕایەوە ووتى: مەفرەزەکەمان پێکهاتبوو لە شەش پێشمەرگە بە فەرماندەى مەحمود شێخۆ ، هەستاین بە ئامادەکردنى تۆپێکى ٥٧ملم لەگەڵ ژمارەیەک گوللە لە باربەرێکمان بارکرد، ملی ڕێگامان گرت و بە بەرزاییدا هەڵگەڕاین تاکو گەیشتینە سەرى سەرەوە نزیک شارۆچکەى سیدەکان.
دواى ئەوەى کە ئامادەکارى پێویستمان کرد لە دامەزراندنى تۆپەکە و وەرگرتنى خاڵى پێکان و لێدانى سەربازگەکە بڕیار درا کە ئێوارە پێش خۆر ئاوابوون چرکەى یەکەم تەقاندنى تۆپەکەمان بێ، کاتێ کە لە ناکاودا چەند گوللە تۆپێک وەک تەرزەى بەهار بەسەر سەربازگەکەدا کەوتنە خوارەوە و بووبە ڕمبە و هۆڕە و تێکەڵ بوونى تۆز و دوکەڵی تۆپباران، بە جۆرێک ناو سەربازگە تێکخرۆشان و نەیان زانى ئەو تۆپبارانە لە کام ئاراستەوە کراوە، هەر ئەوەندەیان بۆ مایەوە کە دەورو بەرى ناوچەکە تۆپباران بکەن، بە تایبەتى گومانیان خستە سەر کێوێکى بەرز لە باکورى سیدەکان بەناوى سەرى سپیندار، بە تۆپەکانیان ئاگریان لەسەرى کردەوە کە چەندین کم لە ئێمەوە دوور بوو، ئێمەش کە نەخشەى چالاکیەکەمان جێبەجێ کرد و ئامانجمان پێکا کاڵا و کەل و پەلی خۆمان پێچایەوە و شوێنەکەمان جێ هێشت.
گومانى تیدا نیە تەواوى چالاکیەکانى پێشمەرگە لە هەر شوێنێک دژ بە دام و دەزگا سەربازى و ئەمنیەکانى ڕژێمى بەعس کە ئەنجام دەدران بە جۆرێک پشێوى و ئاڵۆزى دێنا کایەوە، سەرباز و ئەفسەر و کارمەندە ئەمنیەکانى دوچارى ترس و دڵەڕاوکێ دەبوون بەو پێیەى کە لە ژیان و ئەمانى خۆیان دڵنیا نەبوون.
سەرچاوەکان:
١- سەفەر یوسف میرخان ژاژۆکى، شەهید دکتۆر عبدولڕەحمان زرارى (بەرکۆلێک لە ژیان و پێشمەرگایەتى) چاپخانەی دانیشفەڕ- هەولێر- ٢٠٢٢ .
٢- دیمانە، عەبدولڕەحمان حاجى، سۆران، ٢ی شوباتی ٢٠٢٦.
