لە مێژووی بزووتنەوەی ڕزگاریخوازی کورددا، شەڕی پارتیزانی وەک کاریگەرترین چەکی هێزی پێشمەرگە دژ بە سوپای بەعس ناسراوە. یەکێک لەو چالاکییە جەربەزە و سەرکەوتووانەی کە لە سەرەتای هەشتاکانی سەدەی ڕابردوو ئەنجام درا، بۆسەی گوندی مجێسەر بوو لە دەڤەری برادۆست. دەڤەری برادۆست بەهۆی هەڵکەوتە جوگرافییەکەی و نزیکی لە سنوورەکان، پێگەیەکی ستراتیژی هەبوو بۆ پێشمەرگە، لە هەمان کاتدا ڕێگایەکی سەرەکیی گەیاندنی پێداویستی (تدارەکاتی) سەربازی بوو بۆ شارۆچکەی سیدەکان و ڕەبایەکانی دەوروبەری. ئەم چالاکییە نەک هەر زیانی گیانی و ماددی بە دوژمن گەیاند، بەڵکو کاریگەرییەکی دەروونی قووڵی لەسەر ورەی سوپای عێراق لەو ناوچەیەدا جێهێشت.
بۆ درێژەدان بە چالاکیەکانى پێشمەرگە و لێدان و گەیاندنى زیان بە هێزە سەربازیەکانى ڕژێمى بەعس، مەفرەزەیەکى پێشمەرگە بە فەرماندەى حەمەد مامەند نەخشە و پلانى چالاکیەکى پارتیزانیان دانا، بۆ دانانەوەى بۆسەیەک کە هێرش بکەنە سەر ئۆتۆمبێلە سەربازىیەکانى سوپاى عێراق، دواى تاوتوێکردن و ڕاگۆڕینەوە لەسەر دیاریکردنى شوێنى ئەنجامدانى چالاکى، گەیشتنە ئەو ڕایە کە نزیک گوندى مجێسەرى دەڤەرى برادۆست شوێنێکى گونجاوە بۆ دانانەوەى بۆسە، چونکە شوێنێکى دۆڵاییە و دەڕوانێتە سەر رێگاى سەرەکى کە بە شارۆچکەى سیدەکانى دەگەیەنێت و بەردەوام ئۆتۆمبێلى سەربازى پێدا دەڕۆیشت.
ئێوارەیەکى بەهارى ١٩٨٠ پێشمەرگەکان گەیشتە شوێنى مەبەست هەریەکەو لە شوێنى دیاریکراو جێگیر بوون، بۆ ماویەک لە چاوەڕوانى هاتنى ئۆتۆمبێلێکى سەربازى خۆیان مەلاسدا، لە ناکاوێکدا ئۆتۆمبێلێکى سەربازى جۆرى (جیب قیادە) بە ڕێگاوە بە دیارکەوت بە ئاراستەى بۆسەى پێشمەرگەکان ملی ڕیگاى گرتبوو.
هەرکە ئۆتۆمبێلەکە گەیشتە بۆسەى پێشمەرگەکان هەموویان پێکەوە لێی هاتنە دەست و دایانە بەر دەستڕێژى گوللە، لە ماوەیەکى کەمدا توانیان ئۆتۆمبێلەکە تێبشکێنن و تەواوى سەرنشینان بکوژن کە حەوت سەربازى تێدابوو هیچیان بە سەلامەتى دەرنەچوون، بەڵام لەبەر ئەوەى شوێنەکە سەر ڕێگاى سەرەکى بوو بەردەوام هێزى سەربازى هاتووچۆی پێدا دەکرد، بەرزاییەکانى دەوربەریش ڕەبایە و بنکەى سەربازى بوون پێشمەرگەکان نەیان توانى بچنە شوێنى تێکشکانى ئۆتۆمبێلەکە بۆ دەستبەسەرداگرتن و کۆکۆدنەوەى چەکەکانیان، بەڵکو لەبەر سەلامەتی گیانیان تەنها فریاى ئەوە کەوتن کە لە شوێنەکە دوور بکەونەوەو بە سەلامەتى دەرچن. شایانى باسە چالاکیەکە دەنگدانەوەیەکى زۆرى بە دواى خۆیدا هێناو ترس و تۆقینێکى زۆرى خستە ناو ڕیزەکانى سەربازى سوپاى عێراق.
سەرچاوە:
دیمانە لەگەڵ عەبدولڕەحمان حاجى، سۆران، ٢ى شوباتى ٢٠٢٦.
