Ji dayik bûye Deşî Ziya Yûhna kurê Keşîş Ziya di sala 1952an de li gundê Dergenê li devera Nehêlê ya ser bi qezaya Amêdiyê li parêzgeha Dihokê, bav û bapîrê wî di şoreşên Barzan ên yekem û duyem (1931-1932) û (1943-1945) de beşdar bûne, bavê wî Keşîş Ziya ji şopînerên Barzanî û damezrînerê rêxistinên Partiya Dêmokrata Kurdistanê di nav mesîhiyên devera Nehêlê de bû, dema ku Şoreşa Eylûlê di sala 1961ê de dest pê kir, kadroyekî pêşketî bû û mala xwe kiribû baregeha Pêşmerge.
Deşî Ziya di sala 1969an de tevlî Yekîtiya Xwendekarên Kurdistanê bû û bû endamê wê, di sala 1971ê de beşdarî kongreya Yekîtiya Xwendekarên Kurdistanê li Silêmaniyê bû, di sala 1974an de, ew û Mihemed Hesen Rêkanî xelk teşwîq kirin ku ji bo berevaniyê amade bin piştî vegera artêş û kirêgirtiyên caşan bo deverên wan, piştî şikestina şoreşê di sala 1975an de bi bavê xwe re li gundê xwe man.
Deşî Ziya bi Şoreşa Gulanê ve hat girêdan di sala 1976an de. Di sala 1982an de wekî berpirsiyarê veşartî yê rêxistina Şehîd Mihemed Huseyn hat tayînkirin ku paşê navê wê bo rêxistina Gor li Amêdiyê li parêzgeha Dihokê hat guhertin, di heman demê de berpirsiyarê hêza berevaniya sivîl a devera Nehêlê bû, di Gulana 1983an de bav, hevjîn û bira û xwişka wî şehîd bûn dema ku rejîma Beis bombeyeke destan avêt ser malbata wî.
Di sala 1984an de, hat erkdarkirin ku nameyên veşartî di şaxê yekem ê partiyê de li bajarê Dihokê binivîse, ku Remzî Şaban berpirsiyarê şaxê navborî bû. Di sala 1988an de, piştî kampanyayên Enfalê û êrîşên kîmyayî yên navdar li ser devera Badînanê, Daşî Ziya penaberî Îranê bû û çû rojhilatê Kurdistanê, di serhildana gelê Kurdistanê ya sala 1991ê de beşdar bû, di sala 1992an de wekî endamê komîsyona herêmî ya Amêdiyê li şaxê yekem hat tayînkirin. Di sala 1994an de wekî şaredarê Sersingê yê ser bi qezaya Amêdiyê hat tayînkirin. Di sala 2001ê de wekî endamê komîsyona devera Mankêşkê di nav rêxistinên şaxê yekem de hat tayînkirin, û bû endamê çalak ê şaxê hijdehêm ê partiyê li qezaya Amêdiyê di sala 2005an de dema ku şaxê navborî hat avakirin, di sala 2013an de wekî şêwirmend li şaxê yekem hat tayînkirin, û endamê kongreyên nehem, dehem û yazdehem ên Partiya Dêmokrata Kurdistanê bû. Di sala 2010an de di dema lidarxistina Kongreya Sêzdahêm a Partiya Dêmokrata Kurdistanê de, xelata Barzanî ji aliyê Serok Mesûd Barzanî ve wergirt, wekî rêzgirtinek ji bo wan xizmetên ku pêşkêşî Kurd û Kurdistanê û rêbaza Barzanî ya nemir kirine.
Çavkanî:Arşîva desteya ensîklopediya Partiya Dêmokrata Kurdistanê