سۆران ئیسماعیل ناسراوە بە مامۆستا سۆران، کادر و پێشمەرگەی شۆڕشی گوڵان و ڕاپەڕینە جەماوەریەکەی خەڵکی کوردستان بووە، لە ژیانی پێشمەرگایەتی یەک جار بریندار بووە و پلەکانی ئەندام و کارگێری لیژنە ناوچەی پارتی دیموکراتی کوردستانی وەرگرتووە، لە ساڵی ١٩٩١ لە هێرش بردن بۆ ڕەباییەی سەربازی ڕژێمی بەعس لە سەرتەکی بەمۆ شەهید بووە.

قادر حەمەمراد ئەحمەد، ناسراو بە قادر جەباری، پێشمەرگەی شۆڕشی گوڵان بووە، لە ژیانی پێشمەرگەیاتی یەکجار بە سەختی بریندار بووە، پلەکانی فەرماندەی کەرت و جێگری فەرماندەی بەتالیۆنی وەرگرتووە، ساڵی ١٩٨٨ لە نزیک ڕەباییەی سەربازی ڕژێمی بەعس لە هانەی قوڵی پشتی ئەحمەد ئاوا مینی چێندراوی پێدا تەقیوەتەوە و شەهید بووە.

ئەیوب محەمەد حەمەڕەحیم، کادری ڕێکخستنە نهێنیه‌كانی پارتی دیموکراتی کوردستان بووە، پێشمەرگەی شۆڕشی گوڵان بووە، ساڵی ١٩٨٣ لە شەڕی ئەحمەد ئاوا كەوتۆتە دەست سەربازانی سوپای ڕژێمی بەعس و لە ئەمنی هەڵەبجە لەژێر ئەشکەنجەدا شەهید بووە و یەکێکە لەو شەهیدانەی کە گۆڕی نادیارە.

ئەنجومەن یارئەحمەد ئەفراسیاو، پێشمەرگەی هەردوو شۆڕشی ئەیلوول و شۆڕشی گوڵان بووە، ساڵی ١٩٨٣ لە شەڕی ئەحمەدئاوا شەهید بووە.

ئەمین حەمەکەریم ئیبراهیم، پێشمەرگەی شۆڕشی ئەیلوول بووە، ساڵی ١٩٦٣ لە داستانی پردی زەڵم شەهید بووە و دواتر دەبابە بەسەر جەستەیدا ڕۆشتووە.

عومەر کەریم قادر ناسراوەبە (شەهید شەماڵ)، لە خوێندن دەرچووی قۆناغی ناوەندی بووە، پێشمەرگەی شۆڕشی گوڵان بووە، لە ساڵی ١٩٨٣ لە نزیک ڕووباری سیروان کەوتوونەتە بۆسەی ‌هێزەکانی یەکێتی شەهید بووە.

عومەر عەزیز عوسمان وەهاب، پێشمەرگەی شۆڕشی گوڵان بووە، لە ژیانی پێشمەرگایەتی پلەی سەرپەلی وەرگرتووە، لە ساڵی ١٩٧٩ لەگەڵ سێ هاوسەنگەری لە رۆژهەڵاتی کوردستان کەوتوونەتە بۆسەی هێزەکانی یەکێتی و شەهید کراون.

عابید ڕەحیم عەبدوڵا محەمەد، قوتابی ئامادەیی کشتوکاڵ بووە، پێشمەرگەی شۆڕشی گوڵان بووە، لە ساڵی ١٩٨١ لە گوندی خێڵی حەمەی دەشتی شارەزوور لەلایەن سەرباز و جاشی ڕژێمی بەعسەوە دەستگیر کراوون و بێ سەروو شوێنن، یەکێکە لەو شەهیدانەی کە گۆریان نادیارە.

سەباح باسام نەسڕۆڵا، پێشمەرگەی شۆڕشی گوڵان بووە، لە ساڵی ١٩٨٣ لە شەڕی ئەحمەد ئاوا شەهید بووە.

سلێمان عەبدولڕەحمان محەمەد ناسراوەبە (سلێمان عەبدولڕەحمان تاگۆزی)، پێشمەرگەی شۆڕشی گوڵان بووە، لە ساڵی ١٩٨٣ لەگەڵ دوو هاوسەنگەری لە دەڤەری تاگۆزی کەتوونەتە بۆسەی جاشی ڕژێمی بەعس سلێمان عەبدولڕەحمان تاگۆزی بە برینداری دەستگیر کراوە و دوای یەک ساڵ و سێ مانگ لە گرتووخانەی شاری موسڵ شەهید کراوە.

عەزیز توفیق عەبدولقادر، پێشمەرگەی هەردوو شۆڕشی ئەیلوول و شۆڕشی گوڵان بووە، لە ساڵانی خەباتیدا پلەکانی سەرپەل و سەرلق و بەرپرسی سەربازی بەتالیۆن و فەرماندەی بەتالیۆنی وەرگرتووە، لە ساڵی ١٩٨٢ لە دەڤەری تاگۆزی دوای ڕووبەڕوو بوونەوە لەگەڵ سەربازانی ڕژێمی بەعس بە برینداری دەستگیر کراووە و شەو فیشەک باران کراوە و شەهید بووە.

غەفور محەمەد ساڵح ناسراوەبە (غەفور گڵەجاڵی)، پێشمەرگەی شۆڕشی گوڵان بووە، لە ساڵی ١٩٨٣ لەگەڵ دوو هاوسەنگەری لە دەڤەری تاگۆزی کەتوونەتە بۆسەی جاشی ڕژێمی بەعس و غەفور گڵەجاڵی بە برینداری دەستگیر کراووە و لە لایەن سەرۆک جاشەکەوە سەری لە جەستەی جیا کراوەتەوە و بە بڕە پارەیەک سەرەکەی فرۆشتووە بە ڕژێمی بەعس.