شەهید ئەنوەر حەمەئەمین مەولود، کادر و پێشمەرگەی شۆڕشی گوڵان بووە، پلەی ڕابەری سیاسی هێز و سەرپەرشتیاری شانەی نهێنی ناو شاری وەرگرتووە، ساڵی ١٩٨١ لە ناو شاری سەیدسادق کەوتۆتە بۆسەی هیزێكی یه‌كێتی و شەهید بووە.

محەمەد فەرەج شاوەیس، پێشمەرگەی شۆڕشی گوڵان بووە، لەژیانی پێشمەرگایەتی سێ جار بریندار بووە و پلەی ئەندامی لێژنە ناوچەی وەرگرتووە، ساڵی ١٩٨٦ لە نزیک گوندی ئەحمەدئاوا کەوتوونەتە بۆسەی سەربازی ڕژێمی بەعس و شەهید بووە.

ئیبراهیم توفیق ئەحمەد، کادر و پێشمەرگەی شۆڕشی گوڵان و ڕاپەڕینە جەماوەرییەکەی خەڵکی کوردستان بووە، لە ژیانی پێشمەرگایەتی دوو جار بریندار بووە، ساڵی ١٩٩١ لە ئازادکردنی شاری کەرکووک فیشەکی بەرکەوتووە و شەهید بووە.

شەهید جەبار کاکەخان ئەڵاکەرەم، جەبارە ڕەش، جەبار چوچانی، کادر و پێشمەرگەی شۆڕشی گوڵان بووە، ساڵی ١٩٨٢ لەگەڵ دەستەیەک هاوسەنگەری کەوتوونەتە ناو کێڵگەی مینی چێندراو و لە هەمانکاتدا کەمینی بەعس لێیداون و جەبار شەهید بووە.

شەهید جەبار محەمەد شەریف، پێشمەرگەی شۆڕشی گوڵان بووە، لە ساڵی ١٩٨١ لە دەشتی شارەزوور کەوتوونەتە بۆسەی هێزێکی یه‌كێتی و جەمال و هاوسەنگەرانی شەهید بوونە.

شەهید جەلال محەمەد ئەحمەد، پێشمەرگەی شۆڕشی گوڵان بووە، لە ژیانی پێشمەرگایەتی دووجار بریندار بووە، لە ساڵی ١٩٨٢ لە ڕووبەڕووبوونەوەیەک بە برینداری دەستگیر کراوە و دواتر لە ئەمنی سلێمانی لە سێدارەی سەربازی دراوە و شەهید بووە.

شەهید جەمال ئەسکەندەر مەحمود، لە دوای نسکۆی شۆڕشی ئەیلوول ئاوارەی سەر سنووری ئێران بووە، پێشمەرگەی شۆڕشی گوڵان بووە، تەواوی بنەماڵەکەی زیندانی سیاسی بوونە، لە ژیانی پێشمەرگایەتی یەکجار بریندار بووە، ساڵی ١٩٨٢ دوای ئەنجامدانی چالاکییەکی پارتیزانی لەناو قەزای سەیدسادق کەوتوونەتە بۆسەی سەرباز و جاشی ڕژێمی بەعس و شەهید بووە.

شەهید جەمال عەلی ڕەشید، کادر و پێشمەرگەی هەردوو شۆڕشی ئەیلوول و شۆڕشی گوڵان بووە، دوای نسکۆی شۆڕشی ئەیلوول ئاوارەی وڵاتی ئێران بووە، لە ژیانی پێشمەرگایەتی دووجار بریندار بووە و تا پلەی فەرماندەی هێزی وەرگرتووە، ساڵی ١٩٨١ لە دەشتی شارەزوور کەوتوونەتە بۆسەی هێزێکی یه‌كێتی و جەمال و هاوسەنگەرانی شەهید بوونە.

شەهید جەمال قادر ئەمین، فەرمانبەری حکومەتی ئەوکاتی عێراق بووە، پێشمەرگەی شۆڕشی ئەیلوول بووە، لە ژیانی پێشمەرگایەتی دووجار بریندار بووە و پلەی سەرلقی وەرگرتووە، لە ساڵی ١٩٧٤ لە نزیک عەربەت لە ڕووبەڕووبوونەوەی سەربازی ڕژێمی ئەوکاتی عێراق شەهید بووە.

شەهید حەسەن محەمەد، پێشمەرگەی شۆڕشی گوڵان بووە، لە ژیانی پێشمەرگایەتی یەکجار بریندار بووە، ساڵی ١٩٨٢ لە کاتی ئەرکی پێشمەرگایه‌تی لە سەنگەردا لەلایەن خۆفرۆشێکەوە شەهید کراوە و چەکەکەی و پارچەیەک لە جەستەی بردووە و خۆی ڕادەستی بەعس کردۆتەوە.

شەهید حەمەساڵح عەبدولکەریم، پێشمەرگەی هەردوو شۆڕشی ئەیلوول و گوڵان بووە، لە دوای نسکۆی شۆڕشی ئەیلوول ئاوارەی وڵاتی ئێران بووە و دوای گەڕانەوەی لەلایەن ڕژیمی بەعسەوە بۆ خوارووی عێراق ڕاگوێزراوه‌، لە ژیانی پێشمەرگایەتی و لە شۆڕشی ئەیلوول یەکجار بریندار بووە، لە ساڵی ١٩٨١ لە نزیک گوندی گرێزەی دەشتی شارەزوور لەگەڵ برایەکی کەوتوونەتە بۆسەی هیزێكی یه‌كێتی و شەهید بوونە.

شەهید مەحمود ئەحمەد ڕۆستەم، کادر و پێشمەرگەی شۆڕشی گوڵان بووە، بەرپرسی شانە و چالاکییەکانی ناوشار بووە، ساڵی ١٩٨٨ لەگەڵ چەند هەڤاڵێکی لە سەیدسادق دەستگیر کراون و لە ساڵی ١٩٨٩ لە گرتووخانەی ئەبوغرێب لەگەڵ هەڤاڵێکی لە سێدارە دراون.