ڕەشید محەمەد فەقۆ ناسراو بە ڕەشید ئیسۆمەری لەساڵی ١٩٤١ لە گوندی ئیسۆمەر لە دەڤەری بارزان سەربە قەزای مێرگەسوری پارێزگاى هەولێر لەدایک بووە، ساڵى ١٩٧٥ دواى نسکۆى شۆڕشی ئەیلوول ئاوارەى وڵاتى ئێران بووە و لە شارى نەغەدە نیشتەجێ بووە، لەوێ گوازراوەتەوە بۆ شارى کەرج، ساڵى ١٩٩١ دواى ڕاپەڕینى جەماوەرى باشوورى کوردستان گەڕاوەتەوە باشوورى کوردستان. لە ڕۆژی ٧ی تەمموزی ساڵی ٢٠١٣ کۆچی دوایی کردووە.
ساڵى ١٩٦١ دواى هەڵگیرسانى شۆڕشى ئەیلوول پەیوەندى بە هێزى پێشمەرگەى شۆڕشی ئەیلوول کردووە و لەلاى زوبێر فەقۆى براى بۆتە پێشمەرگە، ڕەشید محەمەد فەقۆ بەشدارى شەڕەکانى گەلى زاویتە و لۆمانا و ماخۆبزنى لەدەڤەرى بادینان کردووە، ساڵى ١٩٦٢ دواى شەهیدبوونى زوبێر فەقۆى براى لە شەڕى مرێبا لە شوێنى ئەو کراوەتە سەرقۆل. بەشدارى شەڕى سەری ئاکرێ لە ساڵى ١٩٦٢ و شەڕى پیرس لە ساڵى ١٩٦٣ کردووە، دواى پاککردنەوەى دەڤەرى بادینان لە سوپا و جاشى عێراق، لەگەڵ مەلامستەفا بارزانى پەڕیوەتەوە بۆ دەڤەرى سۆران و کراوەتە پاسەوانى تایبەتى مەلا مستەفا بارزانی و تا ساڵى ١٩٧٥ لەو ئەرکەى بەردەوام بووە.
ساڵى ١٩٩١ دوای ڕاپەڕینی جەماوەرى باشووری کوردستان گەڕاوەتەوە کوردستان و بەشدارى شەڕى دژى سوپاى عێراق کردووە، ساڵى ١٩٩٣ کراوەتە بەرپرسی لێژنەى کۆمەڵایەتى سەر بە مەکتەبى کۆمەڵایەتى گشتى لە گوندەکانى نزارى.
لە ١٦ی ئابی ١٩٩٦ لە یۆبیلی زێڕینی پارتی بەهۆی ئەو خزمەتانەی پێشکەشی کورد و کوردستان و ڕێبازی بارزانی کردووە، لەلایەن سەرۆک مەسعود بارزانی مەدالیای بارزانی نەمری پێ بەخشراوە.
سەرچاوە:
ئەرشیفى دەستەى ئینسکلۆپیدیاى پارتى دیموکراتى کوردستان.
