شەهید ئیدریس تەمر لە ساڵی ١٩٦٥ لە پارێزگای هەولێر لە دایکبووە، ئاستی خوێندەواری سەرەتایی بووە، دانیشتووی شاری هەولێر بووە. ساڵى ١٩٧٥ دواى نسکۆى شۆڕشى ئەیلوول لەگەڵ خانەوادەکەى ئاوارەى وڵاتى ئێران دەبێت، ساڵى ١٩٧٧ دەگەڕێنەوە و لەلایەن دەزگا ئەمنییەکان بۆ باشوورى عێراق دوور دەخرێنەوە و لە شارى سەماوە نیشتەجێ دەکرێن. ساڵى ١٩٧٩ گەڕاونەتەوە شارى هەولێر.
ساڵى ١٩٨٤ پەیوەندى بەهێزى پێشمەرگەى شۆڕشى گوڵان دەکات و لە ڕێکخراوى هێرش دەبێتە پێشمەرگە. ساڵى ١٩٨٥ دەگوازرێتەوە بۆ لێژنە ناوچەى شەقڵاوە ، هەمان سال پلەى فەرماندەى چالاکییە پارتیزانییەکانى وەرگرتووە، ساڵى ١٩٨٦ بەشدارى لە چالاکى لێدانى هوتێل سەلیم و شەڕى بنارى سەفین لە گوندى ئاقوبان و چالاکى پارتیزانى لێدانى بنکەى پۆلیسى شەقڵاوە کردووە.
لە ٤ى کانوونى یەکەمى ١٩٨٦ لەگەڵ دوو هاوسەنگەرى ترى بۆ ئەنجامدانى چالاکییەکى پارتیزانى کە بریتیی بووە لە لێدانى منەزەمەى حزبی بەعس لە ناحیەى حەریر، دواى ئەنجامدانى چالاکییەکە لەوێ شەهید دەبێت و یەکێکە لەو شەهیدانەى گۆڕى نادیارە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
