شەهید نەجات عەبدوڵا، ساڵی ١٩٥١ لە گوندی ڕوستی سەربە ناحیەی گەڵاڵەی قەزای چۆمانی پارێزگاى هەولێر لە دایکبووە، گوندنشین و سەرقاڵی کاری جوتیاری بووە، تا قۆناغى سەرەتایی خوێندووە، سەڵت بووە.
ساڵى ١٩٦٩ پەیوەندى بەهێزى پێشمەرگەى شۆڕشی ئەیلوول دەکات و لەبەشى تۆپخانەى هێزى باڵەک بۆتە پێشمەرگە، نەجات بۆتە یاریدەدەری بەکارهێنەری تۆپهاوێژى(٢٥ملم ڕەتڵ- مەتفەعیەی ١٢٢ملم مەیدان- مەتفەعیەی ١٥٥ ملم ) کە شەهید عەریف شێخە بەکارهێنەریان بووە. ساڵی ١٩٧٤ بەشداری کردووە لە شەڕەکانی کۆڕەک، گەلی عەلی بەگ، گۆڕەز، بێخاڵ، ڕواندزو بەرسیرین.
ساڵی ١٩٧٤ لەگەڵ دەستەیەک هاوسەنگەری دەچنە سەرکردایەتی شۆڕش بۆ وەرگرتنی گولە و پێداویستی بەشەکەیان، لە کاتی گەڕانەوەیان لە نزیک گوندی بەرسیرین فڕۆکەی ڕژێمی ئەوکاتی عێراق بۆمبارانی کردوون و نەجات و سێ هاوسەنگەری بە سەختی بریندار بوونە، سەرکردایەتی شۆڕش بۆ وەرگرتنی چارەسەر ڕەوانەی وڵاتی ئێرانی کردوون، نەجات عەبدوڵا دوای مانەوەی یەک مانگ لە نەخۆشخانەی شاری مەهاباد بە هۆی سەختی برینەکەیەوە شەهید بووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
