ژياننامە
شەهید مەحمود ئوسمان هالۆ یێ بەرنیاس ب مەحمود هالۆ سالا ١٩٥٦ێ ل گوندێ بوسه‌لێ ل دەڤەرا سندی یا سەر ب قەزا زاخۆ ڤە ژبنە مالەکا كوردپه‌روه‌ر دھێتە سەر دونیایێ، ل سالا ١٩٦٣ دەست ب خواندنا سەرەتایی کریە ل گوندێ بوسەلێ و هەر ل وێرێ ئەڤ قۆناغە ب دووماهی ئینایە، خواندنا خوە یا ناڤنجی و ئامادەیی ل باژێرێ زاخۆ ب دوماهی ئینایە، هەر ل سالا ١٩٧٧ هاتە وەرگرتن ل کولیژا کارگێری و ئابووری ل زانکۆیا موسل و ب پلا هەرە باش ب دووماهی ئینا، ژ بەر ڤێ یەکێ ناڤێ وی دەرچوو بۆ خواندنا بلند (ماستەر)، بەلێ نەقەبوول کرنا وی بۆ ئەندامەتیا حزبا بەعس، ناچار دبیت ماستەرێ قوربانی دۆزا گەلێ خوە بکەت، سالا ١٩٨١ ئاوارەیی وەلاتێ ئیرانێ دبیت، ل سالا ١٩٩٣ دبیتە رێڤەبەرێ گشتی یێ بازرگانی و هەروەسا رێڤەبەرێ گشتی یێ داهات ل کابینا ١ و ٢ یا حکومەتا هەرێمێ، سالا ٢٠٠٠ بوو بریکارێ وەزارەتا دارایی و ئابووری، ل ئێکی شوباتا سالا ٢٠٠٤ێ دهێتە شەهید کرن.
شەهید مەحمود ئوسمان دەستەکێ زێڕین د بوارێ نڤێسینێ ژی دا هەبوویە، باشترین بەلگە ژ بۆ ڤێ چەندێ ژی هەلبەستێن وێنە و ب دەهان بابەتێن ئەدەبی و سیاسی ژی نڤێسینە، چەندین بابەتێن خوە د رۆژنامە و گۆڤارێن سەردەمی شۆرەشێدا بەلاڤ کرینە، شەهیدی پتر ژ سەد هۆزانان نڤێسینە، هەژییە بێژین چەندەک ژ هۆزانێن شەهیدی د پەرتووکەکێ دا هاتینە کومکرن ب ناڤێ (پەیڤێن شەهید) لێ ئەڤ بەرهەمە هاتینە پاراستن و تا نها نەهاتینە چاپ کرن، هەروەسا ژین و هەلبژارتیێن جگەرخوینی د پەرتووکەکێ دا کوم کرینە، هەمی ژی د ناڤبەرا سالێن (١٩٨٠-١٩٨٨) هاتینە نڤێسین ب دەست خەتێ شەهیدی، هەروەسا دیوانا (خەلات) یا هۆزانڤانێ کورد (تیرێژ)ی ژ تیپێن لاتینی وەرگەراندیە سەر تیپێن عەرەبی، پێنج دیوانێن (جگەرخوین) ژ تیپێن لاتینی وەرگەراندینە سەر تیپێن عەرەبی.
خەباتنامە
شەهید مەحمود ئوسمان هالۆ یێ بەرنیاس ب مەحمود هالۆ ساڵا ١٩٧٦دچیتە ناڤ رێزێن رێکخستنا نهێنی یا پارتی دیموکراتی کوردستان، ژ بەر ڤێ چەندێ دەمێ هێشتا قوتابی ل ١١ێ کانوونا ئێکێ ١٩٧٦ ژ لایێ رژێما بەعس ڤە دهێتە گرتن و رەوانەی باژێرێ کەرکووکێ دکەن، ل ٢١ێ ئادارا ١٩٧٧دهێتە ئازاد کرن پشتی ئەشکەنجەدانەکا بێ سنوور، پشتی تەمامکرنا خواندنا زانکۆیێ پەیوەندیێ ب شۆرەشێ دکەت، سالا ١٩٨١ ئاوارەیی وەلاتێ ئیرانێ دبیت و هەر د وێ سالێدا دهێتە هەلبژارتن ژ لایێ شۆرەشێ ڤە بۆ کۆمیتا پەناهندا ل باژێرێ ئورمیێ، سالا ١٩٨٤ ب بڕیارا مەکتەبا سیاسی هاتە وەرگرتن وەکو ئەندامێ بەشێ دارایی.
شەهیدی د چەندین شەڕێن بەرگریێدا بەشداری کریە وەکو داستانا خواکورکی سالا ١٩٨٨ێ و سەرهلدانا سالا١٩٩١ێ، ل ئێکێ شوباتا سالا ٢٠٠٤ێ ل ئێکەمین روژا جەژنا قوربانا پیرۆز ل بارەگایێ لقا دوو ل باژێرێ هەولێرێ د ڕوویدانەکا تیرورستیدا هاتە شەهید کرن.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
