شەهید موحسین یاسین لە ساڵی ١٩٥٤ لە گوندی پیربووبی سەربە ناحیەی زێلکانی قەزای شێخانی دەڤەری بادینان لە دایکبووە، گوندنشین بووە و سەرقاڵی کاری جوتیاری بووە، تا قۆناغى سەرەتایی خوێندووە. ساڵى ١٩٧٥ دواى نسکۆی شۆڕشی ئەیلوول ئاوارەی وڵاتی ئێران بووە و سەرەتا لە پارێزگای ئەهواز و دواتر لە شاری نەغەدە نیشتەجێ بووە. خێزاندار بووە.
ساڵی ١٩٧٦ پەیوەندى بەهێزى پێشمەرگەى شۆڕشی گوڵان کردووە و لە بەتالیۆنى حەسۆ میرخان بۆتە پێشمەرگە. لە ماوەى ژیانى پێشمەرگایەتی خۆی بەشداری زۆرێک لە چالاکییە پارتیزانییەکان کردووە.
ساڵی ١٩٨٣ موحسین یاسین و دەستەیەک هاوسەنگەری لە سەر سنوور و لە نێوان خانێ و حاجی ئۆمەران کەوتوونەتە بۆسەی هێزێکی نەیار و دوژمنی پارتی و دوای دروستبوونی ڕووبەڕووبوونەوە موحسین فیشەکی بەرکەوتووە و شەهید بووە، لەلایەن هاوسەنگەرانی جەستەکەی دەگوازنەوە گۆرستانی شاری نەغەدە و بە خاکی دەسپێرن.
سەرچاوە:
١-ئەرشیفى دەستەى ئینسکلۆپیدیای پارتى دیموکراتى کوردستان.
