شەهید محەمەد ئەول ناوسراو بە (حەمەی عەول)، لە ساڵی ١٩٤٥ لە گوندی سەرای سوبحان ئاغا دەشتی شارەزووری پارێزگاى سلێمانى لە دایکبووە، دانیشتووی گوندی تەپە ڕەشی نزیک سەیدسادق بووە و سەرقاڵی کاسبی ناو بازاڕ بووە، تا قۆناغى سەرەتایی خوێندووە، خێزاندار بووە و خاوەنی دوو کچ و کوڕێک بووە.
ساڵی ١٩٦١ پەیوەندی بە هێزى پێشمەرگەى شۆڕشی ئەیلوول کردووە و لە پەلی حەمەی نەریمان سەربە لقی شەهید کەمال سەلیم سەربە بەتالیۆنی ١٠ی پێنجوێنی هێزی خەباتی پارتی دیموکراتی کوردستان بۆتە پێشمەرگە. لە١ی کانوونی یەکەمی ١٩٦١بەشداری شەڕی نێوان شانەدەری و پێنجوێن و لە ١ی کانوونی یەکەمی ١٩٦١ بۆ ٣٠ی کانوونی یەکەمی ١٩٦١شەڕی شەڕەکانی دەشتی شارەزوور، شەڕەکانی دەڤەری هەورامان، شەڕەکانی چواردەوری پێنجوێن و چیای کوڕەمێو، تازەدێ، گوڵی تازە، کانی سێوەی سورێن، چیای خڕنۆک، سیامێوە، جۆمەرەسی، بانی بنۆک، گەرچینە، چنارە و لە ٢٥ی کانوونی یەکەمی١٩٦٦ شەڕی بەرپەرچدانەوەی هێرشی سەربازی ئەوکاتی عێراق بۆ چیای سورێن و دەڤەری پێنجوێن کردووە.
ساڵی ١٩٧٤ پلەی سەرپەلی لە لقی ئەحمەد چەقژی وەرگرتووە، کە لقی چواری سەربە بەتالیۆنی بەمۆ بەفەرماندەیی حەمە سور حسێن سەر بە هێزی خەبات. دواى ماوەیەک حەمەی عەول وەک سەرپەل گوازراوەتەوە بۆ لقی پێنج بە فەرماندەیی عەریف مەحمود سیاگوێزى سەر بە بەتالیۆنی پێنجوێن بە فەرماندەیی نورى حەمە عەلى سەر بە هێزی خەبات.
لە ٣ی نیسانی ١٩٧٤ سەربازی ڕژێمی ئەوکاتی عێراق هێرشی فراوانیان کردە سەر سەنگەرەکانی هێزی پێشمەرگە لە چیاکانی چواردەوری دەربەندیخان، سەرەتای هێرشەکەی ڕژێم بە تۆپبارانی چڕ دەستی پێکرد و لقەکەی عەریف مەحمود سیاگوێزی بە سەختی کەوتۆتە بەر تۆپبارانەکەوە و لە ئەنجامدا ڕەحیم ماچۆ و حەسەن پیرۆز کەڵتەکەیی شەهید بوونە و حەمەی عەول، عەریف مەحمود، عەبدوڵا گورجی، عەبدولڕەحمان عەبدوڵا، جەمال محەمەد عەبدوڵا بە سەختی بریندار بوونە، هەر پێنج بریندارەکە لەلایەن فەرماندەی بەتالیۆنەوە دەگوازرێنەوە بۆ نەخۆشخانەی شاری مەریوان لە وڵاتی ئێران، بەڵام حەمەی عەول و جەمال محەمەد عەبدوڵا بە هۆی سەختی برینەکەیانەوە لە نەخۆشخانەی مەریوان دەگوازرێنەوە بۆ نەخۆشخانەی شاری سنە و لە ١١ی نیسانی ١٩٧٤ دوای هەشت ڕۆژ مانەوە لە نەخۆشخانە، حەمەی عەول بە هۆی سەختی برینەکەیەوە شەهید بووە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
