شەهید محەمەد عەوڵا لە ساڵی ١٩٤٢ لە گوندی سیقوجانی سەربە ناحیەی دیبەگەی دەڤەری کەندێناوەی قەزای مەخمور لە دایکبووە، گوندنشین بووە و سەرقاڵی کاری جوتیاری بووە، خێزاندار بووە و خاوەنی چوار کوڕ و چوار کچ بوونە، دوای شەهیدبوونی محەمەد عەوڵا خێزانەکەی لەلایەن ڕژێمی ئەوکاتی عێراقەوە دەستگیر کراون و گوازراونەتەوە شاری ڕوومادی و لە قەزای حەدیسە نیشتەجێ کراون، ساڵی ١٩٨٠ توانیویانە بگەڕێنەوە کوردستان.
ساڵی ١٩٦٨ پەیوەندى بە هێزى پێشمەرگەى شۆڕشی ئەیلوول کردووە و لە بەتالیۆنی دووی هێزی دەشتی هەولێری پارتی دیموکراتی کوردستان، بە فەرماندەیی عەریف عوسمان بۆتە پێشمەرگە. بەشداری هەردوو شەڕی گوندی شێوەی گچکە و شێوەی گەورە کردووە و هەروەها بەشداری لە چالاکی گومرگی شاری هەولێر کردووە.
لە مانگی ٤ی ١٩٧٤ محەمەد عەوڵا و هاوسەنگەرانی لە ئەشکەوتی گوندی بنەسڵاوەی بچوک لە سەنگەری بەرگریدا ڕووبەڕووی هێرشی سوپاى ئەوکاتی عێراق بوونەتەوە، دوای ڕووبەڕووبوونەوەیەکی ماوە درێژ محەمەد عەوڵا و فاخیر سەیداوەیی بە برینداری دەکەونە دەست سەربازی ئەوکاتی عێراق و دەستگیر کراون، سەرەتا دەگوازرێنەوە شاری هەولێر و ماوەی سێ مانگ لە زیندانەکانی هەولێر زیندانی کراون، دواتر گوازراونەتەوە شاری موسڵ و دوای دوو مانگ زیندانی کردنییان لە گرتووخانەی شاری موسڵ لە کۆتاییەکانی مانگی ٧ی ١٩٧٤ سزای لە سێدارەدانی سەربازیان بۆ دەرچووە و لە سێدارە دراون و شەهید بوونە.
سەرچاوە:
١-ئەرشیفى دەستەى ئینسکلۆپیدیای پارتى دیموکراتى کوردستان.
