فەتاح کەریم محەمەد ناسراو بە فەتاح هەمەوەندی، ساڵی ١٩٤٥ لە گوندی خاڵدانی سەربە قەزای چەمچەماڵ سەر بە پارێزگاى سلێمانى لە دایکبووە، گوندنشین و سەرقاڵی کاری جوتیاری و ئاژەڵداری بووە، تا قۆناغى سەرەتایی خوێندووە و بۆ بژێوی ژیانی ڕووی کردۆتە بازیان و سەرقاڵی کاسبی ناو بازار بووە.
فەتاح هەمەوەندی، لە ١ی تشرینی یەکەمی ١٩٦٧ پەیوەندی بە هێزى پێشمەرگەى شۆڕشی ئەیلوول کردووە و لە بەتالیۆنی ١٠ بەفەرماندەیی مام کەریم شاکر مەنمى، سەر بەهێزی کەرکووکی پارتی دیموکراتی کوردستان بۆتە پێشمەرگە، دووجار بریندار بووە لە ڕووبەڕووبوونەوەی سەربازی ئەوکاتی عێراق، ساڵى ١٩٦٩ لەدەربەندی بازیان، ساڵى ١٩٧٤ لە گوندی قابی کەر لە بناری چیای سورداش.
فەتاح هەمەوەندی لە ساڵی ١٩٧٤ لەگەل دەستەیەک هاوسەنگەری لە گوندی بی بی جەک لە نزیک بازیان کەوتوونەتە بۆسەی سەربازی ئەوکاتی عێراق و دوای ڕووبەڕووبوونەوە، فەتاح هەمەوەندی شەهید بووە و تەرمەکەى لەلایەن سەربازانی عێراقەوە بردراوە و یەکێکە لەو شەهیدانەی کە گۆڕی نادیارە.
سەرچاوە:
١- ئەرشیفى دەستەى ئینسکلۆپیدیاى پارتى دیموکراتى کوردستان.
