فاروق حەمەعەلی فەرەج، ساڵی ١٩٧٠ لە گوندی نەوێی سەربە ناحیەی خورماڵی پارێزگای هەڵەبجە لە دایکبووە، گوندنشین بووە و سەرقاڵی کاری جوتیاری بووە، تا قۆناغی ناوەندی خویندووه.
ساڵی ١٩٩١ و لە ڕاپەڕینە جەماوەرییەکەی خەڵکی کوردستان لە لێژنەی ناوچەی عەربەتی سەربە لقی چواری پارتی دیموکراتی کوردستان بۆتە پێشمەرگە، ئه‌وکات شەهید ئەکرەم حەمەعەلی بەرپرسی لێژنە ناوچەی بووە، بەشداری ئازادکردنی سەربازگەی باریکە، سەربازگەی ژاڵە، شاری هەڵەبجە، ناحیەی عەربەت، شاری سلێمانی، شاری کەرکووکی کردووە.
لە ٢٠ی ئاداری ١٩٩١ و لە ئازادکردنی شاری کەرکووک، فاروق حەمەعەلی فەرەج لە ناو بارەگای ئەمنی گشتی کەرکووک چەند فیشەکێکی بەرکەوتووە و بەسەختی بریندار بووە، گوازراوەتەوە بۆ نەخۆشخانەی شاری سلێمانی و لە ١ی نیسانی١٩٩١ بەهۆی سەختی برینەکەیەوە لە نەخۆشخانە شەهید بووە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
