عەلی ڕەوف محەمەد، ساڵی ١٩٧١ لە گوندی سەرگەتی سەربە ناحیەی بیارەی پارێزگای هەڵەبجە لە دایکبووە، دانیشتووی شاری هەڵەبجە بووە و تا قۆناغی سه‌ره‌تایی خوێندوویه‌تی.
ساڵی ١٩٨٣ بۆتە کادری شانەی نهێنی شەهید زوڵفەقار مەحمود کە سەربە لێژنە ناوچەی هەڵەبجەی لقی چواری پارتی دیموکراتی کوردستان بووە. ساڵی ١٩٨٣ یەکێک بووە لە بەشداربووانی خۆپێشاندانەکەی شاری هەڵەبجە بەم هۆیەوە ماوەی دوومانگ لەلایەن ئەمنی ڕژێمی بەعسەوە دەستگیر کراوە.
ساڵی ١٩٨٥ بۆتە پێشمەرگە لە مەفرەزەی شەهید زوڵفەقار کە سەربە باڵی سەربازی لێژنەی ناوچەی هەڵەبجە بووە، ساڵی ١٩٩١ بەشداری ڕاپەڕینە جەماوەرییەکی خەڵکی کوردستانی کردووە، له ئازادکردنی قەزای پێنجوێن، شاری هەڵەبجە، ناحیەی عەربەت، قەزای دەربەندیخان، دەڤەری قەرەداغ، پارێزگای سلێمانی، پارێزگای کەرکووک به‌شداری كردووه، لە ئازادکردنی دەڤەری قەرەداغ فیشەکی بەرکەوتووە و بریندار بووە.
عەلی ڕەوف محەمەد لەگەڵ حەوت هاوسەنگەری لەسەر گردی پیرۆز لەناو شاری سلێمانی سەنگەری بەرگری دادەمەزرێنن و بەرپەچی دوو هێرشی سەربازی ڕژێمی بەعس دەدەنەوە، بەڵام لە ٨ی تشرینی یەکەمی ١٩٩١ لەلایەن تۆپخانەکانی بەعسەوە گردەکە دراوەتە بەر تۆپ و گولە هاوەن، لە ئەنجامدا عەلی ڕەوف محەمەد و هەر حەوت هاوسەنگەرەکەی شەهید بوونە.
سەرچاوە:
- ئەرشیفی دەستەی ئینسکلۆپیدیای پارتی دیموکراتی کوردستان.
