ژیاننامە
شەهید عەلی عارف ڕەحیم حەمەکەریم، ساڵی ١٩٧١ لە گوندی دەرەی مەڕ سەر بە ناحیەی بیارە لە دەڤەری هەورامان لە دایکبووە، گوندنشین بووە و سەرقاڵی خوێندن بووە تا قۆناغی سەرەتایی لە بیارە خوێندووە، دواتر بۆ درێژەدان بە خوێندنی قۆناغی ناوەندی ڕووی کردۆتە پارێزگای هەڵەبجە، ساڵی ١٩٨٧ لە نزیک خورماڵ شەهید بووە.
خەباتنامە
شەهید عەلی عارف ڕەحیم لە کاتی قوتابی بوونی لە شاری هەڵەبجە و ساڵی ١٩٨٦ پەیوەندی لەگەڵ شانە نهێنیەکانی ناو شاری هەڵەبجە دروست کردووە، کە لەوکاتەدا شانەکان سەر بە لێژنە ناوچەی هەڵەبجەی لقی چواری پارتی دیموکراتی کوردستان بوونە و شەهید سۆران ئیسماعیل پلەی کارگێڕی ناوچە بووە و سەرپەرشتیاری شانە نهێنیەکان کردووە.
ساڵی ١٩٨٧ لە چالاکییەکدا لەناو شاری هەڵەبجە ئاشکرا بووە و چۆتەشاخ، بۆتە پێشمەرگە لەلای شەهیدی فەرماندە سەرداری حاجی حسێن دەرەقەیسەری کە فەرماندەی هێزێکی تایبەت بوو لەناو هێزی هەورامان و لقی چواردا.
ساڵی ١٩٨٧ لە شەڕی ئەحمەد ئاوا و هانەی قوڵ کە هێزی پێشمەرگە ڕووبەڕووبووی هێزێکی زۆری سەربازی ڕژێمی بەعس بوونەوە، عەلی عارف ڕەحیم و هاوسەنگەرانی بە فەرماندەی شەهید سەردار دەرەقەیسەری لە شەقامی نێوان ناحیەی خورماڵ و ئەحمەدئاوا بۆسەیان بۆ کاروانە سەربازییەکە داناوە تا ڕێگەیان لێ بگرن و دەرفەتیان نەدەن بگەنە سەنگەرەکانی پێشمەرگە لە ئەحمەد ئاوا، دوای ڕووبەڕووبوونەوەیان کاروانەکەیان تێکشکاندووە، بەڵام لە کاتی پاشەکشەی سەربازانی ڕژێمی بەعس، لەسەر قەڵای خورماڵەوە بەعسیەکان بە دۆشکە فیشەک بارانی هێزەکەی پێشمەرگەیان کردووە، لە ئەنجامدا فیشەکی دۆشکە بەر ملی عەلی عارف ڕەحیم کەوتووە و شەهید بووە.
سەرچاوە:
ئەرشیفی دەستەی ئینسکلۆپیدیای پارتی پارتی دیموکراتی کوردستان.
